Над Чорным морам расейскі Су-27 пашкодзіў амерыканскі беспілотнік. Дрон знішчаны
Тэлеканал CNN паведаміў пра інцыдэнт з удзелам амерыканскага беспілотніка і расейскіх знішчальнікаў Су-27 над Чорным морам. У выніку дрон быў пашкоджаны, і самі амерыканцы яго збілі. Вайскова-паветраныя сілы ЗША абвінавацілі расейскіх пілотаў у «неабдуманых, экалагічна небяспечных і непрафесійных дзеяннях».
Неназваная крыніца CNN паведаміла, што інцыдэнт адбыўся над міжнароднымі водамі. Побач з амерыканскім дронам Reaper былі два знішчальнікі Су-27. Адзін з самалётаў «наўмысна праляцеў перад беспілотнікам і скінуў у яго паліва». У выніку быў пашкоджаны прапелер у задняй частцы дрона, і ЗША пастанавілі збіць свой беспілотнік.
У заяве Вайскова-паветраных сілаў ЗША гаворыцца, што расейскі пілот дзейнічаў «неабдумана, непрафесійна і экалагічна небяспечна».
Пры гэтым еўрапейскае камандаванне Узброеных сілаў ЗША сцвярджае, што апарат «выконваў звычайныя аперацыі ў міжнароднай паветранай прасторы, калі быў перахоплены і збіты расейскім самалётам, што прывяло да катастрофы і поўнай страты MQ-9».
Гэта першае вядомае сутыкненне ЗША і Расеі за час вайны ва Украіне і патэнцыйна небяспечная эскалацыя, адзначае тэлеканал CNN.
З дапамогаю беспілотнікаў Reaper амерыканцы назіраюць за рэгіёнам, яны выкарыстоўвалі гэтыя дроны над Чорным морам і да пачатку вайны.
Расея гэтае здарэнне пакуль ніяк не пракаментавала.
Сяргей Крот belsat.eu
