«Наша Ніва»: студзеньская аблава на сваякоў палітвязняў закранула нашмат больш людзей, чым меркавалася
Пад затрыманні трапілі нават тыя, хто проста пісаў лісты палітвязням. Затрыманыя распавядалі, што лічба тых, каго сілавікі збіраліся «адпрацаваць», – 700 чалавек, піша «Наша Ніва».
Затрыманням на працягу трох дзён папярэднічалі спробы ўзлому тэлеграм-акаўнтаў сваякоў палітвязняў і тых, хто дапамагаў зняволеным. Паводле інфармацыі ад крыніцаў «Нашай Нівы», рэйды сілавікоў пачаліся яшчэ да 23 студзеня. Ахвяры аблаваў казалі, што на гэты дзень следчыя былі ўжо стомленыя і між сабой згадвалі, што «не спалі чатыры дні».
Таксама гучала і лічба затрыманых, якіх трэба «адпрацаваць», – 700 чалавек. Аднак не зразумела, ці ішла гаворка пра ўсю Беларусь альбо пра нейкі рэгіён.
Інфармацыя пра велізарную колькасць затрыманых пацвярджаецца і ўскосна: прадстаўніца фонду «Краіна для жыцця» Вольга Зазулінская казала, што, паводле іхных звестак, у справе працуюць 174 следчыя.
Большасць людзей адпускалі пасля адносна непрацяглых допытаў. Найперш кадэбістаў цікавіла, праз якія крыніцы палітвязні і іхныя сем’і атрымліваюць дапамогу, а таксама тое, хто сістэмна дапамагае вязням унутры Беларусі.
Прынамсі аднаго з затрыманых абвінавацілі ў тым, што ён атрымліваў грошы на картку і пасля перадаваў іх семʼям палітвязняў, а таксама адпраўляў ім пасылкі. І хоць грошы былі не з фондаў, а ад сяброў і знаёмых, гэта ні на што не паўплывала. Наколькі вядома, цяпер гэты чалавек у СІЗА.
Большая частка затрыманых падчас аблавы – не вядомыя грамадскасці пажылыя жанчыны. Яны не сваячкі палітвязняў і не актывісткі, а проста дапамагалі тым ці іншым чынам палітвязням. Напрыклад, у следчы ізалятар змясцілі 61-гадовую гамяльчанку Алену Тоцкую, якая некалі была судовай валанцёркай і хадзіла на палітычныя суды ў Гомлі.
Адзін з суразмоўцаў распавёў, што з ім у КДБ была бабуля, якая некаму пералічыла пару разоў па пяць рублёў. Тое самае казалі і праваабаронцы. Самай пажылой з вядомых затрыманых жанчын 82 гады.
Некаторых затрымлівалі за напісанне лістоў. Стала вядома, што заказныя лісты ў СІЗА і калоніі адсочваюцца, а адпраўнікі запісваюцца. Тое самае цяпер робяць і з пасылкамі. Гэтыя спісы СІЗА і калоніі перадаў КДБ.
Шмат каму з затрыманых не вярнулі пашпарты. Імаверна, гэта робіцца, каб людзі не маглі выехаць з краіны і баяліся размаўляць з праваабаронцамі ды медыямі.
Масавыя затрыманні сваякоў палітвязняў, а таксама тых, хто дапамагаў зняволеным і іхным сем’ям грашыма і прадуктамі, адбыліся ў Беларусі 23–24 студзеня. Праваабаронцам вядомыя імёны 229 затрыманых і 24 чалавек, якія сталі падазраванымі або абвінавачанымі ў крымінальных справах.
Марыя Міхалевіч belsat.eu
