Нацыянальны запаведнік Кіева-Пячэрская лаўра ў Кіеве разрывае дамову бязвыплатнага карыстання з Украінскай праваслаўнай царквой Маскоўскага патрыярхату і абавязаў яе прадстаўнікоў пакінуць тэрыторыю і будынкі да 29 сакавіка 2023 года. Манахі адмовіліся, паведамляе ukrinform.ua.
Намеснік Кіева-Пячэрскай лаўры мітрапаліт Павел заявіў у відэазвароце, што манахі не будуць высяляцца.
«Мы не супраць усіх законных дзеянняў, але супрацьзаконных не можа быць. Мы не калабаранты, мы грамадзяне сваёй дзяржавы», – сказаў мітрапаліт.
Раней міністр культуры і інфармацыйнай палітыкі Украіны Аляксандр Ткачэнка заяўляў, што манахі змогуць застацца ў Лаўры пасля выканання пэўных умоваў пасля сканчэння дзяржаўных праверак.
Міністр таксама сказаў, што ў выпадку адмовы манахаў выканаць умовы і пакінуць тэрыторыю запаведніка, гвалтоўныя дзеянні прымяняцца не будуць – улада будзе дзейнічаць у рамках закону. Адначасова Кіева-Пячэрская лаўра застанецца месцам правядзення богаслужэнняў і рэлігійных абрадаў.
Марыя Міхалевіч belsat.eu