Стварэнне Фонду падтрымкі палітвязняў абмяркуе Святлана Ціханоўская са спікеркаю Еўрапарламенту
Сустрэча Святланы Ціханоўскай і спікеркі Еўрапарламенту Раберты Мятсолы павінна адбыцца 13 студзеня ў віленскім офісе беларускай лідаркі, паведамляе «Парламентский канал» са спасылкай на палітыка Анатоля Лябедзьку.
Падчас сустрэчы будзе абмяркоўвацца ідэя стварэння Фонду падтрымкі беларускіх палітвязняў. Паводле Анатоля Лябедзькі, у гэтым пытанні «маецца падтрымка з боку дэлегацыі Еўрапарламенту па Беларусі».
Сярод іншых тэмаў сустрэчы:
- Падрыхтоўка і падпісанне дакументу аб узаемадзеянні і супрацы Еўрапейскага Парламенту і дэмакратычных сілаў Беларусі.
«Важна закласці прававы падмурак узаемаадносінаў да канца кадэнцыі гэтага складу Парламенту», – зазначае Анатоль Лябедзька.
- Уключэнне ў выбарчую праграму Еўрапейскай народнай партыі на выбарах у Еўрапарламент пунктаў, датычных Беларусі – пытанняў вызвалення палітвязняў, еўрапейскай перспектывы для Беларусі, прыцягнення да адказнасці тых, хто здзяйсняе злачынствы ў Беларусі.
Папярэдняя сустрэча Раберты Мятсолы і Святланы Ціханоўскай адбылася 13 верасня 2023 года ў Страсбургу, падчас сесіі Еўрапарламенту.
Выбары ў Еўрапарламент пройдуць з 6 па 9 чэрвеня 2024 года.
Марыя Міхалевіч belsat.eu
