Пракуратура завяла крымінальную справу за распіл бройлераў на птушкафабрыцы «Дружба»
Баранавіцкая міжраённая пракуратура завяла крымінальную справу супраць службовых асоб птушкафабрыкі «Дружба» за распіл курэй, паведамляецца ў Telegram-канале Генпракуратуры Беларусі. Гэты «інавацыйны» прадукт палічылі «перавышэннем службовых паўнамоцтваў».
Баранавіцкая міжраённая пракуратура завяла справу паводле 426 артыкулу Крымінальнага кодэксу «Перавышэнне службовых паўнамоцтваў, здзейсненае з карыслівай ці асабовай зацікаўленасці». Пад пераслед трапілі неназваныя кіраўнікі птушкафабрыкі «Дружба», якія далі ўказанне падначаленым пілаваць тушкі куранят, каб прадаваць гэты прадукт па завышаным кошце.
Як паведамляе Генпракуратура, топ-менеджмент фабрыкі праігнараваў патрабаванне не павышаць цэны на сацыяльна значымы тавар і вырашыў, што распілаваная тушка – гэта новы від тавару, які не трапляе пад цэнавыя абмежаванні.
У Камітэце дзяржкантролю Берасцейскай вобласці ўдакладнілі, што кіраўніцтва прадпрыемства намагалася атрымаць як мага больш грошай за продаж такіх куранят, каб займець прэміі за прыбытак і рэнтабельнасць.
Паводле падлікаў кантралёраў, «Дружба» зарабіла на распілаваных бройлерах больш за 6 мільёнаў рублёў.
Расследаванне крымінальнай справы даручана Следчаму камітэту.
Раней міністэрства гандлю і антыманапольнага рэгулявання прыняло асобную пастанову пра рэгуляванне цэнаў на курэй. Вызначана, што распілаваны на часткі бройлер мусіць каштаваць столькі, колькі і цэлая тушка. Да цаны на асобныя часткі дазваляецца дадаваць 10% ад кошту ўсёй тушкі. Таксама ўведзеныя максімальныя надбаўкі на курынае філе, а крамам наогул забаранілі самастойна разбіраць курэй. Такія захады ўведзеныя на 90 дзён.
Масавыя праверкі ў гандлі пачаліся пасля нарады Лукашэнкі, на якой ён запатрабаваў замарозіць цэны. Напярэдадні стала вядома, што за іх павышэнне ўжо заведзена больш за 10 крымінальных справаў.
Сяргей Крот belsat.eu
