З пятніцы, калі закрыўся пункт пропуска Бераставіца–Баброўнікі, расце чарга цяжкавікоў у Берасці на выезд у Польшчу. Паводле звестак Дзяржаўнага памежнага камітэту на 16 гадзінаў, афармлення на тэрмінале Казловічы чакаюць больш за 50 фур. На другім баку мяжы назбіралася каля паўтысячы грузавікоў, паведамляе агенцтва PAP.
Інфаграфіка на сайце Дзяржаўнага памежнага камітэту сведчыць, што з пятніцы павялічваецца чарга грузавікоў у пункце пропуска Казловічы на выезд у Польшчу. Гэта адзіны тэрмінал, дзе фуры маюць магчымасць перасекчы граніцу.
Паводле звестак беларускіх памежнікаў на 16 гадзінаў, у чарзе ў Казловічах – больш за 50 грузавікоў.
Па той бок мяжы сітуацыя горшая. Як паведамляе агенцтва PAP, у Кукурыках назбіралася каля 550 грузавікоў. Час чакання сягае 18 гадзінаў. У суботу ўвечары машын было яшчэ болей, прыблізна 600, а ў чарзе прыходзілася стаяць і па 20 гадзінаў.
Што тычыцца пасажырскага транспарту, то ў чарзе на выезд з Беларусі ў Польшчу, паводле падлікаў аператара зоны чакання, зараз больш за 270 аўтамабіляў. На адваротным шляху, як паведамляе польскі бок, чаргі няма. За мінулую змену на пераходзе ў Тэрэспалі аформлена 656 транспартных сродкаў, у тым ліку 599 легкавых машын і 57 аўтобусаў, удакладняе PAP.
Пункт пропуска Бераставіца–Баброўнікі закрыўся 10 лютага. У Варшаве растлумачылі гэта «захадамі нацыянальнай бяспекі». Пастанову ўхвалілі на наступны дзень пасля прысуду журналісту, актывісту незалежнага Саюзу палякаў Анджэю Пачобуту.
Цяпер на беларуска-польскай мяжы працуе толькі два пераходы: Брэст–Тэрэспаль для легкавікоў ды аўтобусаў і Казловічы – Кукурыкі для цяжкавікоў.
Сяргей Крот belsat.eu