З раніцы ў Менску ідзе моцны снег. Камунальнікі не даюць рады і просяць гараджанаў аб дапамозе. У сталіцы адкрылі «пункты выдачы шанцавага інвентару насельніцтву», паведамляе агенцтва «Менск-Навіны».
Сіноптыкі абвесцілі на сёння ў Беларусі аранжавы ўзровень небяспекі.
«На большай частцы тэрыторыі моцныя, месцамі вельмі моцныя ападкі (снег, па паўднёва-ўсходняй палове мокры снег, дождж), мяцеліца, на дарогах снежныя заносы, галалёд. У шмат якіх раёнах узмацненне паўночна-ўсходняга ветру», – гаворыцца ў паведамленні Белгідрамету.
Камунальнікі запэўніваюць, што задзейнічалі ўсе магутнасці для ўборкі снегу, але рук не хапае. Прадпрыемства «Менская гарадская жыллёвая гаспадарка» заклікала жыхароў сталіцы далучыцца да расчысткі.
«Запрашаем гараджанаў далучыцца да навядзення парадку ў дварах, бо сумеснымі намаганнямі расчысціць двары атрымаецца значна хутчэй», – гаворыцца ў паведамленні агенцтва «Менск-Навіны».
Уладальнікам аўтамабіляў нагадалі, што, паводле правілаў добраўпарадкавання Менску, яны абавязаныя прыбіраць снег вакол сваіх прыпаркаваных машын.
Таксама апублікаваны спіс адрасоў, дзе менчукі могуць узяць «шанцавы інвентар». У асобных выпадках абяцаюць прывезці лапату пасля званку па тэлефоне.
Дзяржаўтаінспекцыя папрасіла наогул не выязджаць на асабістых машынах, а карыстацца грамадскім транспартам. Калі паездка неабходная, то за стырном раяць быць асцярожнымі.
Тым часам прадпрыемства «Менсктранс» папярэдзіла пра збоі ў руху грамадскага транспарту.
«У сувязі з неспрыяльнымі ўмовамі надвор’я магчымыя збоі ў раскладзе руху пасажырскага транспарту. Улічвайце гэтую інфармацыю пры паездках», – гаворыцца ў абвестцы.
Аранжавы ўзровень небяспекі будзе трываць як мінімум да ранку панядзелка. Сіноптыкі кажуць, што «неспрыяльныя ўмовы захаваюцца цягам ночы 12 снежня».
Сяргей Крот belsat.eu