Пенсіі ў Беларусі падвысяць на 5 % са снежня, сярэдняя пенсія мае скласці 272,6 долара
Міністэрства працы Беларусі паведаміла аб падвышэнні ўсіх працоўных пенсіяў ад 1 снежня 2022 года. У сярэднім пенсіі падвысяць на 5 %, сярэдняя пенсія мае вырасці да 670 рублёў або 272,6 долара паводле курсу Нацбанку на 11 лістапада.
Памер падвышэння пенсіі будзе індывідуальным для кожнага пенсіянера, не агульны для ўсіх. Як адзначае міністэрства, гэта трэцяе падвышэнне з пачатку года, да снежня-2021 пенсіі павялічылі на 23 %. У снежні 2020 года сярэдняя пенсія складала 511 рублёў або 200,54 долара.
Інфляцыя пры гэтым за першыя 9 месяцаў года склала 14,8 %, інфляцыю за 10 месяцаў – пасля замарозкі цэнаў – пакуль трымаюць у сакрэце. Таксама пакуль не публікавалі статыстыку аб заробках у кастрычніку і нейкіх іншых афіцыйных звестак, якія дазволілі б ацаніць уплыў замарозкі цэнаў на эканоміку.
Алесь Наваборскі belsat.eu
