Беларуская тэнісістка Арына Сабаленка страціла лідарства ў Жаночай тэніснай асацыяцыі (WTA), якое яна трымала амаль два месяцы. Замест яе першаю ракеткаю свету зрабілася полька Іга Сьвёнтэк.
Польская тэнісістка выгуляла Выніковы турнір WTA ў Мексіцы, абышоўшы ў фінале амерыканку Джэсіку Пэгулу (6:1, 6:0). Перад гэтым у паўфінале яна перагуляла якраз беларуску (6:3, 6:2). Гэта дазволіла Ізе Сьвёнтэк вярнуць лідарства ў рэйтынгу, адабраўшы статус першай ракеткі ў Арыны Сабаленкі.
Выніковы турнір WTA стаў апошнім прэстыжным турнірам 2023 года.
Сабаленка была першаю ракеткаю з 11 верасня. У статусе найлепшай тэнісісткі яна правяла 8 тыдняў. Цікавы момант: насупраць прозвішча Сабаленкі на афіцыйным сайце WTA адсутнічае дзяржаўны чырвона-зялёны сцяжок.
Беларусы і раней рабіліся першымі ракеткамі свету: у 2012–2013 годзе – Вікторыя Азаранка, у 2003-м – Максім Мірны, які выступаў у парным разрадзе.
Якуб Хруст belsat.eu