Імя беларускай тэнісісткі з’явілася на першым радку рэйтынгу Жаночай тэніснай асацыяцыі (WTA).
Цікавы момант: насупраць прозвішча Арыны Сабаленкі адсутнічае дзяржаўны чырвона-зялёны сцяжок. Няма яго і насупраць прозвішча Вікторыі Азаранкі (цяпер яна на 23-м месцы рэйтынгу), як няма расейскага сцяжка насупраць прозвішчаў тэнісістак з Расейскай Федэрацыі.
Беларусы ўжо не ўпершыню робяцца першымі ракеткамі свету: у 2012–2013 годзе – Вікторыя Азаранка, у 2003-м – Максім Мірны, які выступаў у парным разрадзе.
Арына Сабаленка ў 2020 годзе падпісала праўладны ліст спартоўцаў, а пазней трапляла ў скандалы з нагоды таго, што адмаўлялася адназначна выказваццца супраць вайны ва Украіне і рэжыму Аляксандра Лукашэнкі.
6 чэрвеня 2023 года пасля матчу ў чвэрцьфінале «Roland Garros» Сабаленка заявіла, што не падтрымлівае вайны ды Аляксандра Лукашэнкі, адзначыўшы, што яна не экспертка ў палітыцы ды не хоча, каб ейная краіна была ўцягнутая ў вайну.
Раман Шавель belsat.eu
