ГУБАЗіК завёў крымінальную справу за правядзенне марафону салідарнасці «Нам не ўсё адно!»
МУС Беларусі пачаў крымінальную справу ў дачыненні ўдзельнікаў жывой трансляцыі онлайн-марафону салідарнасці з палітвязнямі «Нам не ўсё адно!». Матэрыялы для завядзення справы сабраў ГУБАЗіК.
Падазраванымі ў справе сталі «каля 60 асобаў з ліку арганізатараў марафону і іхных памагатых».
Збор сродкаў для палітвязняў і іхных сваякоў у МУС ахарактарызавалі як «фінансаванне экстрэмісцкай дзейнасці».
Онлайн-марафон салідарнасці з палітычнымі вязнямі Беларусі «Нам не ўсё адно!» адбыўся ў ліпені. Сродкі збіраліся тры дні – 28–30 ліпеня, падчас марафону людзі ахвяравалі амаль 575 тысячаў еўраў. Ініцыяваў правядзенне стрыму Аб’яднаны пераходны камітэт. У яго арганізацыі і правядзенні ўдзельнічалі больш як 20 незалежных медыяў, у тым ліку і «Белсат».
Больш як 200 тысяч еўраў ужо пералічаныя ў фонд «BYSOL», а таксама праваабарончай ініцыятыве дапамогі палітзняволеным «Dissidentby», дабрачыннаму фонду «Краіна для жыцця», дабрачыннай арганізацыі «Littouwin Lions Club», фонду дапамогі беларусам у Літве «Razam», Беларускай радзе культуры, ініцыятыве «BY_help» і «Анархічнаму чорнаму крыжу – Беларусь».
Стрымы з марафону ўжо былі раней прызнаныя ўладамі Беларусі «экстрэмісцкімі матэрыяламі».
Якуб Хруст belsat.eu
