Марафон салідарнасці з палітвязнямі «Нам не ўсё адно!» прызналі «экстрэмісцкім»

Стрымы з першага марафону салідарнасці з палітвязнямі «Нам не ўсё адно!» прызнаныя ўладамі Беларусі «экстрэмісцкімі матэрыяламі». Іх унеслі ў адпаведны спіс на сайце Міністэрства інфармацыі.

Павел Латушка ў студыі «Белсату» прэзентуе некаторыя лоты, якія НАУ выставіла на аўкцыён падчас онлайн-марафону салідарнасці з палітвязнямі. 29 ліпеня 2023 года. Варшава, Польшча.

Фота: Ян Лісіцкі / Белсат

Рашэнне прынятае судом Цэнтральнага раёну Менску 29 жніўня. У спіс трапілі больш за дзесяць відэазапісаў стрыму на Youtube.

Марафон салідарнасці з палітвязнямі праходзіў 29–30 ліпеня ў онлайн-рэжыме, і кожны мог ахвяраваць любую суму на падтрыманне палітвязняў у Беларусі і іхных сем’яў. Падчас марафону ўдалося сабраць больш за 574 000 еўраў. У яго арганізацыі і правядзенні ўдзельнічалі больш за 20 незалежных СМІ, у тым ліку і «Белсат».

Таксама спіс «экстрэмісцкіх матэрыялаў» папоўнілі:

• тэлеграм-каналы «Новая Жизнь Минск / New Life Church Minsk», «Будзьма беларусамі!», «ЧАТ Беларусы ў Ізраілі», «FREEINFOBEL»;
• сайт і сацсеткі праекту «Штодзень»;
• старонкі ў Facebook «Церковь “Новая Жизнь”», «Budzma Belarusami»;
• суполка ў «Вконтакте» «Беларусь. Экономика и политика (MorningDope)»;
• TikTok-старонкі «Belorussian mapper», «VERDIKT», «бчбандеровка».

Алена Рувіна belsat.eu