Ужо заўтра, 4 красавіка, Фінляндыя афіцыйна далучыцца да NATO. Гэта пацвердзіў генеральны сакратар Альянсу Енс Стольтэнбэрг на брыфінгу ў Бруселі 3 красавіка.
Фінляндыя і Швецыя доўгі час былі нейтральнымі краінамі, але ў траўні 2022 года – пасля пачатку поўнамаштабнай вайны ва Украіне – падалі заяўкі на далучэнне да NATO.
У пачатку ліпеня 2022 года міністры замежных справаў Фінляндыі і Швецыі Пэка Хаавіста і Ан Ліндэ, а таксама амбасадары 30 краінаў NATO падпісалі пратаколы пра далучэнне краінаў у Паўночнаатлантычны альянс. Аднак ратыфікацыя пратаколаў Вугоршчынай і Турцыяй затрымалася.
У канцы мінулага тыдня прэзідэнт і парламент Турэччыны зацвердзілі фінскую заяўку на далучэнне да NATO – адсутнасць дазволу Турэччыны была апошняю перашкодаю. Раней Турэччына выступала супраць і патрабавала ад Фінляндыі «больш актыўнай супрацы ў барацьбе з тэрарызмам» – у прыватнасці, з прадстаўнікамі Курдскай працоўнай партыі. Супраць далучэння Фінляндыі да NATO выступала таксама Вугоршчына, але 27 сакавіка вугорскі парламент даў дазвол.
Пратаколу аб уступленні Швецыі пакуль не ўхваліла Турцыя.
Алена Рувіна belsat.eu
