У Польшчы 2 траўня адзначаецца Дзень польскай дыяспары і палякаў замежжа. У гэты дзень сакратар Канцылярыі прэзідэнта Польшчы Анджэй Дэра заявіў, што ў Беларусі склалася найгоршая сітуацыя палякаў замежжа, бо там яны зазнаюць палітычны пераслед.
«У Беларусі знішчаюцца польскія могілкі, разбураюцца магілы польскіх герояў. Цяпер гэта афіцыйная палітыка Беларусі. На гэты момант мы не можам непасрэдна дапамагаць нашым суайчыннікам, але мы намагаемся гэта рабіць па-іншаму, не буду распавядаць падрабязнасці, каб дапамога не спынілася. Цяпер там у палякаў самая складаная сітуацыя», – заявіў Анджэй Дэра.
Ён падкрэсліў, што рэжым Лукашэнкі варожа ставіцца да польскай спадчыны, мэтанакіравана яе вынішчае.
Паводле польскага МЗС, у Беларусі Пачынаючы з мінулага года знішчаныя або апаганеныя як мінімум 13 месцаў памяці палякаў, у тым ліку ваенных пахаванняў, помнікаў і памятных знакаў. Вядома пра падобныя выпадкі ў вёсках Мікулішкі, Багданы, Плябанішкі, Варзяны, Дындылішкі, Качычы, Бабровічы, Сурканты, у Горадні і Іўе.
Па дадзеных перапісу насельніцтва за 2009 у Беларусі палякамі назвалі сябе 294,5 тысяч чалавек. Пераважная большасць з іх пражывае ў Гарадзенскай вобласці.
Алена Рувіна belsat.eu