Каб хутчэй атрымаць турыстычную шэнгенскую візу, некаторыя беларусы гатовыя ісці на хітрыкі. Адна са схемаў – падацца на тую візу, якую прасцей атрымаць, а паехаць туды, куды хочацца. Чаму гэта кепская ідэя, расказала стваральніца праекту Visaflow.live Анастасія Лысакоўская.
Анастасія кажа, што ёсць краіны, у якія беларусам атрымаць візу лягчэй. Найпрасцей – у Іспанію. Візавы цэнтр два разы на месяц прапаноўвае тэрміны для падачы дакументаў на наступныя паўмесяца. Саму візу ў гэтую краіну даводзіцца чакаць да 60 дзён. Пры наяўнасці багатай візавай гісторыі можна спрабаваць атрымаць візу на адзін-два гады.
А вось чэргі на нямецкую і італьянскую візы вельмі доўгія. Тэрміну падачы дакументаў на нямецкую візу можна чакаць год-паўтара. Падобная сітуацыя з італьянскай візай, дзе на падачу дакументаў трэба запісвацца ў «сшытак» – чаргу, у якой ужо зараз каля 30 тысячаў асобаў.
Вельмі патрабавальныя да дакументаў палякі. Турыстычная віза ў Польшчу выдаецца на столькі дзён, на колькі просіць той, хто падаецца. Пры гэтым трэба паказаць пацверджанне аплаты гатэлю і падрабязна распісаць свой маршрут ды апісаць месцы, якія хочаш наведаць, напрыклад, варшаўскі парк Лазенкі.
У гэтых абставінах некаторыя беларусы спрабуюць узламаць сістэму – падацца на візу той краіны, якая прасцей яе выдае, а адпачываць – у іншай. Гэта вельмі небяспечна, бо адпаведныя службы сочаць за сумленнасцю турыстаў.
Ёсць пытанні з Грэцыяй, як кажа Анастасія. Датаў на падачу дакументаў хапае, але Грэцыя з нядаўнага часу правярае рэзервацыю гатэляў. У выпадку адмены рэзервацыі можна атрымаць ануляванне візы – такіх выпадкаў было ўжо дастаткова шмат.
Таксама сурова сочыць за дакументамі турыстаў Балгарыя.
Агулам, для атрымання турыстычнай візы спатрэбяцца:
- талон на падачу (ваш запіс на падачу дакументаў, фота, пашпарт). Тут можна абысціся без платных «памагатараў» – трэба проста сачыць, калі з'яўляюцца свабодныя тэрміны для падачы дакументаў.
- Пашпарт, якому засталося не менш за тры месяцы да заканчэння тэрміну дзеяння. Асобна разглядаецца візавая гісторыя, падкрэслівае Анастасія. Атрымаць доўгатэрміновую візу ў пусты пашпарт амаль немагчыма. Хіба што ваш муж або жонка жыве ў краіне Шэнгенскай дамовы. Таму варта пакінуць сабе стары пашпарт або ягоную копію, калі вы атрымліваеце новы.
- Копія пашпарта.
- Даведка з працы за тры месяцы з указаннем пасады ды іншай інфармацыі.
- Выпіс з карэспандэнцкага рахунку за 3–6 месяцаў з дадатным балансам (больш за 2000 еўраў на чалавека) і з гісторыяй руху сродкаў. Схема «пазычыць у сяброў грошы, каб пакласці на рахунак, каб паказаць выпіску ў амбасадзе» не працуе.
- ІП прыкладае дакументы ІП, студэнт – студэнцкі білет і даведку з ВНУ, беспрацоўны – дакументы спонсара (мужа, жонкі, каханка, каханкі і г. д.).
- Страхоўка на ўвесь перыяд паездкі, не менш за 30 000 еўраў.
- Консульскі збор (візавы цэнтр прымае зборы ў рублях, консульствы – у еўрах).
- Рэзервацыя гатэлю і квіткоў.
Дакладны спіс дакументаў трэба ўдакладняць у візавым цэнтры ці консульстве, у якім вы збіраецеся падаваць дакументы!
Поўную версію размовы з Анастасіяй глядзіце ў праграме «Раніца з «Белсатам»:
