Беларусы ў TikTok выкладваюць свае меркаванні з бояззю за ўраджай чарніцаў сёлета.
Не паспелі беларусы перажыць бульбяны крызіс, як на яго змену прыйшоў цыбулевы, а цяпер набліжаецца яшчэ і чарніцавы. Пачалося з таго, што фермер з Гомельскай вобласці паказаў на відэа ў TikTok голыя кусты чарніцаў і пракаментаваў: «Ягады памерзлі, ягадаў няма. Прычым паўсюль. Аб'ездзіў усе месцы, усе нізіны».
Пад ягоным відэа разгарнулася цэлая дыскусія, дзе карыстальнікі TikTok падзяліліся сваймі назіраннямі, заўважыў «Telegraf.news».
І ў іншых жыхароў Гомельскага рэгіёну настрой з нагоды ўраджаю не лепшы: «Светлагорскі раён таксама гола», «Гомельскі раён – ягадаў няма. Квітнела проста супер, але, на жаль, замаразкі ўсё сапсавалі», «У Мазырскім раёне такая ж сітуацыя, сумна».
У Калінкавічах і Светлагорску адзін з каментатараў заявіў: «Такога не памятаю ўвогуле, каб так не было ягадаў», «у Рагачоўскім раёне таксама пуста».
«У Берасцейскай вобласці няма, сёння з лесу прыехала, нават не верыцца», «Мала, збіраць няма чаго, большасць кустоў без ягадаў», «сёння пад Берасцем крыху сабрала, але вельмі дробная».
«У нас у Магілёўскай вобласці (вёска Гарбацэвічы) таксама пуста, «Быхаўскі [раён] таксама пусты».
«Мяркуючы з каментароў, няма ўвогуле нідзе ў Беларусі ягадаў», – зрабіў выснову адзін з карыстальнікаў.
Іншы каментатар адказаў, што чарніцы ёсць, але ў таемных месцах:
«Летась яна часткова быццам вымерзла, а мы прадавалі толькі так яе на кірмашы, і ўсе казалі: "Адкуль чарніцы і дзе бераце іх?". Сакрэт фірмы – свае месцы не выкрываюцца, дзе не дастае мароз. Ёсць такія мясціны!»
Затое ў Віцебскай вобласці ягада, здаецца, ёсць: «У Расонскім раёне валам, усе да нас ляціце!»
Пачатак сезону збору чарніцаў звычайна надыходзіць у другой палове чэрвеня і доўжыцца да сярэдзіны жніўня. Але ўсё залежыць ад надвор'я: напрыклад, калі ў першы месяц лета холадна, тое квітненне чарніцаў затрымліваецца, а значыць, ягады паспеюць толькі да сярэдзіны жніўня ці пачатку верасня. А якраз чэрвень у Беларусі выдаўся халодным і вельмі дажджлівым, так што чакаць чарніцы і дурніцы варта са спазненнем.
Тэса Анэйда belsat.eu
