Бундэстаг прыняў гістарычную заяву: новы пакет фінансавання абыходзіць «даўгавы тормаз», замацаваны ў Канстытуцыі з 2009 года.
Парламент Нямеччыны, Бундэстаг, 18 сакавіка ўхваліў рэформу «даўгавога тормазу»: выдаткі на палітыку бяспекі цяпер не будуць улічвацца ў правіле, якое забараняе дэфіцыт бюджэту. Пастанова прадугледжвае таксама стварэнне спецыяльнага фонду на 500 млрд еўраў для інвестыцыяў у інфраструктуру і ў дасягненне кліматычнай нейтральнасці да 2045 года. Закон яшчэ мае ўхваліць Бундэсрат – федэральная рада Нямеччыны.
Рашэнне ў Бундэстагу вымагала дзвюх трацінаў галасоў, бо ўносіла змены ў асноўны закон краіны. Галасаванне ў гэтым пытанні пастанавілі правесці цяпер, старым складам Бундэстагу, бо ў наступным, які склаўся па выніках выбараў 23 лютага і мае набыць паўнамоцтвы 25 сакавіка, левыя і ўльтраправыя маюць больш як траціну галасоў: яны маглі б заблакаваць ініцыятыву. Але і ў старым складзе не было бальшыні прыхільнікаў ідэі, а хрысціянскім дэмакратам і сацыял-дэмакратам давялося пайсці на саступку зялёным: аддаць пятую частку фонду на зялёныя ініцыятывы.
Некаторыя каментатары адзначалі, што гэта недэмакратычны крок, які супярэчыць перадвыбарчай платформе хрысціянскіх дэмакратаў. Але гэты крок апраўдвалі надзвычайнай сітуацыяй, выкліканай ізаляцыянісцкай палітыкай Злучаных Штатаў за Доналдам Трампам.
Лідар хрысціянскіх дэмакратаў і меркаваны будучы канцлер Фрыдрых Мэрц адзначыў: Уладзімір Пуцін вядзе агрэсіўную вайну не толькі супраць Украіны, а супраць Еўропы, таму Нямеччыне патрэбная «змена парадыгмы ў палітыцы абароны». Лярс Клінгбайль, лідар сацыял-дэмакратаў, якія маюць увайсці ў кіроўную кааліцыю, казаў, што зараз Нямеччына мае ўзяць на сябе адказнасць і лідарства ў Еўропе.
Пастанову крытыкавалі свабодныя дэмакраты і ўльтраправая «Альтэрнатыва для Нямеччыны». Першыя былі прынцыпова супраць скасавання «даўгавога тормазу»: сярод нямецкіх эканамістаў склаўся ледзьве не культ «чорнага нуля» – імкненне пазбягаць росту запазычанасці. Другія ж крытыкавалі не толькі рост даўгоў, але і заяўлялі: «Новых ворагаў нам не трэба. Не патрэбная нам і так званая баяздольнасць».
