16 сакавіка Латвія прыпыняла рух праз «Патэрніекі». 18 сакавіка ўлады Латвіі вырашылі, што з наступнага дня рух будзе закрыты для пешых і раварыстаў, дазволены толькі для аўтамабільнага транспарту.
Кабінет міністраў Латвіі 18 сакавіка пастанавіў з наступнага дня закрыць пункты пропуску на межах з Беларуссю і Расеяй для пешых і раварыстаў, пакінуць адкрытым толькі для аўтатранспарту, перадае «LSM». Міністэрства ўнутраных справаў прапанавала такі крок пасля аналізу пераходу мяжы: міністр Рыхардс Казлоўскіс заявіў, што цяпер назіраюцца тэндэнцыі, як некалі на расейска-фінскай мяжы. Паводле яго, значная колькасць асобаў спрабуе нелегальна перайсці мяжу на роварах і скутарах.
Казлоўскіс падкрэсліў, што рашэнне не забараняе пераходзіць мяжу на механізаваным транспарце і не пазбаўляе памежнікаў абавязку прымаць хадайніцтвы аб наданні прытулку.
Як адзначыла «LSM», на латвійска-беларускай мяжы з 1 жніўня 2021 года па 16 сакавіка 2025-га прадухілілі 28 836 спробаў незаконнага траплення ў Латвію грамадзянаў трэціх краінаў.
Колькі з гэтых спробаў былі праз афіцыйныя пераходы пешшу ці на роварах, не ўдакладняецца. На расейска-фінскай мяжы сапраўды назіралі групы раварыстаў, якія спрабавалі прайсці мяжу праз афіцыйныя пераходы і прасіць прытулку. Згадак такіх выпадкаў у Літвіі знайсці не ўдалося, але ўдалося знайсці згадкі незаконнай перавозкі мігрантаў на аўтамабілях, замаскаваных пад машыны памежнікаў і паліцыянтаў.
16 сакавіка Латвія блакавала «Патэрніекі» (адзіны адкрыты пункт пропуску на мяжы з Беларуссю), спаслаўшыся на праблемы з тэхнічнымі сістэмамі і небяспеку, што імі могуць скарыстацца нерэгулярныя мігранты.
Другі пункт пропуску, «Сілэнэ» (з беларускага боку гэта КПП «Урбаны»), урад Латвіі пастанавіў закрыць 19 верасня 2023 года. Рашэнне тлумачылі захадамі бяспекі ў сувязі з міграцыйным крызісам.
Яшчэ два памежныя пераходы адкрытыя на беларуска-літоўскай мяжы, яшчэ адзін – на беларуска-польскай. Памежныя пераходы на беларуска-ўкраінскай мяжы практычна цалкам закрытыя («Даманава» працуе для тых украінцаў, якія хочуць вярнуцца на радзіму). Памежнага кантролю на беларуска-расейскай мяжы практычна няма.
Алесь Наваборскі belsat.eu
