Латвія часова спыніла рух праз адзіны дзейны пункт пропуску «Грыгараўшчына» на мяжы з Беларуссю. Закрыты як уезд, так і выезд для грузавога і легкавога транспарту.
На месцы ўсталяваныя загараджальныя шчыты. Пра гэта паведамляецца ў адным з чатаў, прысвечаных пераезду мяжы.
Верагодна, гэтае блакаванне звязанае з вайсковымі вучэннямі, якія праходзяць у Латгаліі да 18 сакавіка. Пра іх правядзенне папярэджвалі ў медыях.
Так, вядома, што палявыя тактычныя вучэнні пад назвай «Жалезны град» (Dzels krusa) праводзяцца з 12 да 18 сакавіка ў ваколіцы Рэзэкнэ Аўгшдаугаўскага краю і на вайсковым палігоне ў Адажы.
У сувязі з гэтым на маршрутах «Лузнава – Даўгаўпілс – Лузнава» і «Даўгаўпілс – Адажы – Даўгаўпілс» адбываецца перамяшчэнне вайсковай тэхнікі.
Сітуацыю пракаментаваў беларускі Дзяржаўны мытны камітэт РБ. Паводле яго паведамлення, з 14:00 латвійскі бок спыніў афармленне транспарту, што рухаецца праз адзіны дзейны пункт пропуску «Грыгараўшчына» на беларуска-латвійскай мяжы.
«На цяперашні момант чэргаў транспарту ў гэтым кірунку няма, але сітуацыя можа змяніцца», – паведамілі ў беларускім ведамстве.
Раман Шавель belsat.eu
