Былая палітзняволеная Ксенія Луцкіна расказала ў эфіры «Белсату» пра дзіўнае і непрыемнае адчуванне: хоць выйшла на волю яшчэ летась у жніўні, толькі пасля выезду з Беларусі адчула сябе вольнай.
Ксенія Луцкіна – былая журналістка Белтэлерадыёкампаніі, якая ў жніўні 2020 года далучылася да паслявыбарчага страйку і ўвайшла ў асноўны склад Каардынацыйнай рады. 22 снежня 2020-га яе затрымалі ў Менску. За «змову з мэтаю захапіць дзяржаўную ўладу» засудзілі на 8 гадоў пазбаўлення волі. У зняволенні ў Ксеніі абвастрыліся праблемы са здароўем. 20 жніўня 2024-га Ксенію Луцкіну вызвалілі на падставе «памілавання», а 3 сакавіка 2025-га з дапамогаю каманды эвакуацыі «BYSOL» пакінула Беларусь.
На наступны дзень па пераездзе яна дала каментар «Белсату». Урывак размовы – у «Студыі» ад 37:26.
У эфіры «Белсату» яна растлумачыла, што не можа расказаць, як яе вывозілі з Беларусі, бо застаюцца тыя, каму гэты шлях, на жаль, можа спатрэбіцца.
,,«Трэба, каб гэты час, калі трэба з’язджаць з краіны, мінуў. Гэта такая мая мара», – кажа Луцкіна.
Яна расказвае, што ў дзень выезду з Беларусі адчувала сябе парадаксальна і не надта прыемна: адчула сябе ўпершыню вольнаю, хоць амаль паўгода была не за кратамі.
«Учора я сябе адчула, нібы я ўчора выйшла, калі ступіла ў іншай краіне, – расказвае Ксенія. – У чужой краіне ты становішся – і табе кажуць: „Усё добра, далей усё будзе добра“. А ты разумееш, што гэта жудасная рэч, што табе трэба з’язджаць з Радзімы, і вольным ты сябе адчуваеш у іншай краіне».
Першы час па пераездзе Луцкіна збіраецца займацца здароўем, дакладных планаў не мае. Расказвае, што яшчэ ў Беларусі рабіла абследаванні па вызваленні, частка пытанняў развязаная, стан стабілізаваны, але трэба развязаць «глабальную праблему».
,,«Па-першае, я хачу жыць! Я ўжо жыву. І хачу жыць такім поўным жыццём, свабодным. Цяпер я магу не фільтраваць, што я каму кажу. Гэта ўжо свабода. І я вельмі хачу працаваць, застацца ў прафесіі, наколькі гэта будзе магчыма».
Луцкіна падзякавала тым, хто яе падтрымліваў і падтрымлівае. Спадзяецца, што не расчаруе людзей, якія былі побач з ёй, і абяцае рабіць усё магчымае, каб аддзячыць за «ўсю тую чалавечую любоў», якую атрымала ў турме і на волі.
Пасля 4 гадоў няволі і перанесеных хваробаў ёй неабходная тэрміновая медычная дапамога, аднаўленне і падтрыманне. «BYSOL» адкрыў збор, каб дапамагчы Ксеніі пачаць новае жыццё. На момант публікацыі сабралі тры тысячы еўраў з неабходных сямі.
