Кожны чалавек, які працуе ў Польшчы, можа накіраваць да 1,5 % сваіх абавязковых падаткаў на дабрачыннасць. «Белсат» нагадвае, як гэта можна зрабіць.
Што гэта за сістэма?
На адрозненне ад Беларусі, дзе амаль уся дабрачыннасць існуе на валанцёрскіх асновах і насуперак сістэме, польская дзяржава штомесяц дасылае да 1,5 % падаткаў кожнага працаўніка на дабрачыннасць. Што важна: гэта не даплата да падаткаў зверху, адсотак ужо закладзены загадзя.
Пры гэтым не мае розніцы, па якой умове вы працуеце: калі вы плаціце падатак, яго частку можна накіраваць на дапамогу іншым.
Куды канкрэтна іх накіраваць, выбірае ці сам працаўнік, ці мясцовая падатковая служба (калі чалавек сам не пазначыў). Гэтыя грошы могуць быць накіраваныя на дапамогу жывёлінам, хворым дзецям, валанцёрам, фондам дабрачыннасці, мясцовым спартовым клубам, навучальным установам і г. д.
Як зразумець, каму можна дапамагчы?
Фізічная асоба не можа атрымліваць такую дапамогу беспасярэдне, гэта можа быць толькі грамадская арганізацыя, што не займаецца камерцыйнай дзейнасцю, мае празрыстую справаздачнасць і працуе ў Польшчы не менш за два гады.
Усе арганізацыі (а іх няшмат), якія маюць права прымаць грошы ад падаткаплатнікаў, маюць свой нумар KRS і ўсе яны пералічаныя вось тут і тут. Знайсці арганізацыю, якой вы хочаце накіроўваць свае падаткі, можна паводле фільтраў – лакацыі, сферы дзейнасці, назвы.
Калі вам спадабаўся прытулак для жывёлінаў побач з домам – вы можаце спытаць іхны нумар KRS і пералічваць свае грошы адразу туды.
У канцы кожнага года арганізацыі мусяць рабіць справаздачу пра тое, колькі атрымалі грошаў і куды іх накіравалі.
Ці можна падтрымаць беларускія ініцыятывы ў Польшчы?
У Польшчы працуюць некаторыя беларускія фонды і дабрачынныя арганізацыі, якім таксама можна дапамагчы сваімі падаткамі. Адныя атрымліваюць грошы самастойна, другія – праз партнёрства з іншымі арганізацыямі, што маюць нумар KRS.
Напрыклад, накіраваць грошы можна ў Беларускі моладзевы хаб, які штогод ладзіць бясплатныя імпрэзы для беларусаў у Варшаве. (KRS партнёраў «Młodzi – młodym» 0000270261, мэта накіравання – «HUB Warszawa 11876»).
Беларускае культурніцкае таварыства «Хатка» – найстарэйшая беларуская арганізацыя на польскім Памор’і, якая ўжо 30 гадоў дапамагае беларусам (нумар KRS партнёраў з FUNDACJA FANIMANI – 0000507234, мэта – 82280).
Яшчэ некалькі добрых ініцыятываў – «Купалаўцы» (КRS: 0000270261, мэта накіравання – KUPALAUCY 19547), «Музей Вольнай Беларусі» (KRS: 0000270261, мэта – «MUZEUM WOLNEJ BIAŁORUSI 18974»), «Partyzanka» (KRS: 0000507234, мэта – 85537), кракаўская суполка «Крок» (KRS: 0000270261, мэта – 18686), «Вольны хор» (KRS 0000085851, мэта накіравання – Na Volny Chor), выданне Hrodna.life (KRS: 0000507234, мэта – 85554), выданне Reform.news (KRS: 0000602244, мэта – Pomoc dla Reform.news), «Новая Беларусь» (KRS партнёра Fundacja FaniManі - 0000507234, мэта – 82452) ды іншыя.
Як накіраваць свае грошы на дабрачыннасць?
Наёмныя працаўнікі ў Польшчы атрымліваюць свае падаткавыя дэкларацыі PIT штогод пасля 15 лютага (індывідуальныя прадпрымальнікі – jednoosobowa działalność gospodarcza – запаўняюць самі). Праз гэтую дэкларацыю вы можаце некалькімі клікамі накіраваць свае грошы на дабрачыннасць.
Каб накіраваць частку вашага падатку на дабрачыннасць, у пункце 147 дэкларацыі ўвядзіце нумар KRS, у пункце 148 – «1,5 %» ці іншы памер, не вышэйшы за гэты, у пункце 149 – мэту накіравання, калі хочаце дапамагчы камусьці канкрэтнаму ці дапамагаеце суполцы праз яе партнёраў). У клетачцы 151 пазначце свой мэйл – туды вам раз на год будзе прыходзіць справаздача, на якія мэты пайшлі вашыя грошы.
Трэба адзначыць, што 1,5 % падаткаў – гэта максімальны памер дапамогі праз гэтую сістэму, але вы можаце паставіць розныя значэнні. І нават накіроўваць 0,75 % адной арганізацыі, а астатнія 0,75 % – іншай. Ці накіроўваць 1 % куды захочаце, а астатнія 0,5 % размяркуе сама падаткавая.
Калі вы пастанавілі накіраваць грошы на дапамогу беларусам праз іншую арганізацыю-партнёра, у дэкларацыі абавязкова пазначайце мэту накіравання, інакш грошы пойдуць партнёрам.
Зрабіць гэта лепш да 30 красавіка, але выбар можна змяніць у любы час, нават пасля запаўнення падатковай дэкларацыі.
Тэса Анэйда belsat.eu
