Пад новыя санкцыі трапілі «Газпром Нефть» і «Сургутнефтегаз». А Украіна пачала атрымліваць грошы, вяртаць якія мае з замарожаных расейскіх актываў.
Дэпартамент скарбніцы – міністэрства фінансаў Злучаных Штатаў – абвясціла 10 студзеня аб новых санкцыях, скіраваных супраць нафтавай галіны Расеі. Пад санкцыі трапілі расейскія нафтавыя гіганты «Газпром Нефть» і «Сургутнефтегаз», а таксама іхныя падраздзяленні ў Расеі, Таджыкістане, Казахстане, Кыргызстане, Сербіі і Люксембургу, у ліку якіх «Сургутнефтегазбанк».
Таксама пад санкцыі трапілі «Совкомфлот» і «Роснефтефлот», іхныя падраздзяленні і караблі пад сцягамі Расеі, Барбадосу і Панамы; шэраг кампаніяў і караблёў з трэціх краінаў, якіх аднеслі да расейскага «ценявога флоту»; дзве расейскія марскія страхавыя кампаніі; нафтавы трэйдар «Black Pearl Energy Trading» з Аб’яднаных Арабскіх Эміратаў і звязаныя з ім кампаніі; шэраг кампаніяў і кіраўнікоў энергетычнага сектару Расеі…
,,«Злучаныя Штаты прымаюць шырокія захады супраць галоўнай крыніцы даходаў Расеі для фінансавання ейнай жорсткай і незаконнай вайны супраць Украіны», – патлумачыла Сакратарка скарбніцы ЗША (міністарка фінансаў) Джэнэт Елен.
Дзяржаўны дэпартамент ЗША (міністэрства замежных справаў) тым часам прымае іншыя захады для скарачэння прыбыткаў Расеі ад энергетыкі: блакуе два актыўныя праекты, звязаныя са звадкаваным прыродным газам; буйны расейскі нафтавы праект; кампаніі трэціх краінаў, якія падтрымліваюць экспарт расейскіх энерганосьбітаў; увёў санкцыі супраць расейскіх пастаўнікаў нафтавых сэрвісаў, шэрагу кіраўнікоў «Росатома» і гэтак далей.
Злучанае Каралеўства абвясціла, што далучаецца да санкцыяў ЗША супраць «Газпром Нефти» і «Сургутнефтегаза». У мінулым месяцы Каралеўства наклала санкцыі на больш як два дзясяткі караблёў, звязаных з транспартаваннем расейскай нафты.
У канцы мінулага года пайшлі чуткі аб тым, што краіны «Вялікай сямёркі» таксама думаюць аб больш жорсткім абмежаванні цэнаў на расейскую нафту ці аб нейкіх новых забаронах адносна яе.
Украіна тым часам атрымала ад Еўразвязу першыя 3 млрд еўра з крэдыту на каля 18 млрд, які «Вялікая сямёрка» выдала пад фінансаванне з замарожаных расейскіх актываў, паведаміла старшыня Еўрапейскай камісіі Урзуля фон дэр Ляен.
Прэм’ер-міністр Украіны Дзяніс Шмыгаль выказаў падзяку ад імя Украіны: напісаў, што гэтыя грошы ёсць «сведчаннем непахіснай падтрымкі Еўразвязу ў супрацьстаянні расейскай агрэсіі, забеспячэнні макраэканамічнай стабільнасці і аднаўленні крытычнай інфраструктуры».
Алесь Наваборскі belsat.eu