Канстанцін Бычак, начальнік следчага ўпраўлення КДБ Беларусі, заявіў, што ведамства не збіраецца мяняць затрыманых у краіне замежнікаў на беларусаў, асуджаных за мяжой за шпіянаж.
«Сапраўды ў Рэспубліцы Беларусь у месцах пазбаўлення волі адбывае пакаранне вялікая колькасць замежных грамадзянаў, у тым ліку грамадзянаў Польшчы, краінаў Балтыі, іншых краінаў Захаду за супрацу са спецслужбамі замежных дзяржаваў. Гэтыя асобы асуджаныя за шпіянаж або агентурную дзейнасць. Іхная вінаватасць устаноўленая выракамі судоў, якія набылі законную моц, на падставе доказаў, у тым ліку прызнальных паказанняў», – адзначыў прадстаўнік КДБ.
Бычак заявіў, што на ведамства «рэгулярна выходзяць прадстаўнікі замежных спецслужбаў з прапановай абмяняць гэтых асобаў на грамадзянаў Рэспублікі Беларусь, якія застаюцца ў іхных турмах».
,,«Пры гэтым для абмену яны прапануюць рабаўнікоў, гвалтаўнікоў, наркаманаў, махляроў і іншых. У сувязі з гэтым афіцыйная пазіцыя камітэту – мы нікога не мяняем. Ні ў Польшчы, ні ў Балтыі, ні ў іншых краінах Захаду няма грамадзянаў Рэспублікі Беларусь, якія супрацоўнічалі з КДБ, якія былі асуджаныя за гэта і адбываюць там пакаранне», – сказаў Канстанцін Бычак.
Пасля пачатку поўнамаштабнай вайны Расеі супраць Украіны ў Беларусі часцей пачалі пераследаваць замежнікаў нібыта за агентурную дзейнасць – артыкул 358-1 КК. Пад яго ўжо трапілі 19 грамадзянаў Украіны, Літвы, Латвіі, Польшчы, Японіі, Нямеччыны. Агулам гэтых асобаў асудзілі на 135 гадоў пазбаўлення волі.
У сваю чаргу затрыманні абвінавачваных у шпіянажы на карысць Беларусі адбываюцца і за мяжой. У Польшчы ў канцы 2023-га паведамлялі, што за сем гадоў польская контрвыведка затрымала 46 шпіёнаў з Беларусі і Расеі, з іх не менш за 22 асобы – з пачатку поўнамаштабнай вайны ва Украіне. За першую палову 2024 года затрымалі яшчэ 18 чалавек, якіх западозрылі ў шпіянажы на карысць Беларусі і Расеі.
Якуб Хруст belsat.eu
