Спроба нападу на намесніка Святланы Ціханоўскай, кіраўніка Народнага антыкрызіснага ўпраўлення Паўла Латушку была здзейсненая 2 ліпеня падчас урачыстага сходу ў Цэнтры ўсходнееўрапейскіх даследаванняў Варшаўскага ўніверсітэту ў прысутнасці афіцыйных асобаў Польшчы і дыпламатычнага корпусу.
Пра напад палітык расказаў у сваім тэлеграм-канале.
,,«Нападнік кінуў у мяне вядро і крычаў на ўсю залу, што я «здраднік і хацеў спаліць апазіцыянераў», паўтараючы ўчорашнюю хлусню Лукашэнкі. У цяперашні момант ён затрыманы паліцыяй», – напісаў Латушка.
Паводле кіраўніка НАУ, апошнімі днямі ён атрымлівае папярэджанні аб планаванні правакацыяў у дачыненні яго і пагрозы жыццю.
«Гэта ніякім чынам не паўплывае на маю дзейнасць. Лукашэнка, ты адкажаш за свае злачынствы», – кажа палітык.
Нападнік – 33-гадовы Яўген Казанцаў, піша «Reform.by». Мужчына прыехаў вучыцца ў Цэнтры ўсходнееўрапейскіх даследаванняў Варшаўскага ўніверсітэту. Ён апавёў журналісту выдання, што напаў на Латушку, бо ў яго скончылася віза, ён выгарэў і не здолеў абараніць навуковую працу. А напад, паводле мужчыны, дазволіць яму свабодна вярнуцца ў Беларусь.
У верасні 2022 года Казанцаў даваў інтэрв’ю тэлеканалу СТВ як магістр гістарычных навук, даследнік. 8 гадоў таму СТВ рабіла сюжэт пра яго як пра чалавека, які «прыдумаў гербы для ўсіх раёнаў Менску».
Яўген Казанцаў нарадзіўся ў Менску 5 верасня 1991 года. Вучыўся на гістарычным факультэце БДУ і ў Рэспубліканскім інстытуце вышэйшай школы.
1 ліпеня Аляксандр Лукашэнка падчас выступу на ўрачыстым сходзе з нагоды 3 ліпеня заявіў, што гэта менавіта Павел Латушка хацеў сабраць у паслявыбарчую ноч у цэнтры Менску штаб Ціханоўскай і спаліць яго, каб зрабіцца лідарам апазіцыі.
«Паталагічны хлус Лукашэнка персягнуў самога сябе. У ноч з 9 на 10 жніўня 2020 года я быў генеральным дырэктарам Купалаўскага тэатру і сваімі вачыма бачыў зарыва ад вогненных выбухаў гранатаў над цэнтрам Менску, калі паводле ягонага загаду пачалі забіваць і здзекавацца з беларусаў», – адказаў Латушка.
Марыя Міхалевіч belsat.eu
