Міністэрства замежных справаў Арменіі накіравала беларускаму боку ноту пратэсту, абвінаваціўшы афіцыйны Менск ва ўмяшанні ва ўнутраныя справы краіны.
Як перадае «Арменпресс», пра гэта 14 чэрвеня паведаміла прэс-сакратар МЗС Арменіі Ані Бадалян.
«У сувязі з каментаром прэс-сакратара МЗС Беларусі, зробленым 13 чэрвеня, у прыватнасці ўмяшаннем ва ўнутраныя справы Рэспублікі Арменія, беларускаму боку была накіравана нота пратэсту.
Дадамо, што пажаданне мець кіраўнікоў, якія б думалі пра будучыню сваёй краіны, можа зыходзіць ад таго, хто сам гэтым валодае. У выпадку з Беларуссю на дадзены момант гэта сапраўды раскоша», – заявіла спікерка МЗС Арменіі.
Дыпламатычны крызіс у стасунках паміж Арменіяй і рэжымам у Менску распачаўся пасля візіту Аляксандра Лукашэнкі ў Азербайджан і заяваў армянскага прэм’ера Нікола Пашыньяна. Падчас візіту ў Азербайджан і наведвання тэрыторыяў, якія раней уваходзілі ў зону нагорна-карабахскага канфлікту, самаабвешчаны кіраўнік Беларусі назваў вайну Азербайджану за Карабах «вызваленчаю». Прэм’ер-міністр Арменіі Нікол Пашыньян, выступаючы 12 чэрвеня ў армянскім парламенце, заявіў, што Ерэван рыхтуецца да выхаду з АДКБ, а ён сам ніколі не паедзе ў Беларусь, пакуль пасаду прэзідэнта там займае Лукашэнка.
Выданне «Politico» паведаміла, уцеклыя дакументы даюць разуменне таго, чаму Арменія пастанавіла рыхтавацца да выхаду з АДКБ: Беларусь пастаўляла Азербайджану сучаснае вайсковае абсталяванне між 2018 і 2022 гадамі. Гэта адбывалася падчас вайны Азербайджану супраць Арменіі і армянскай самаабвешчанай рэспублікі Арцах (Нагорны Карабах), якая капітулявала ў 2023-м. Пры тым, што Беларусь і Арменія – саюзнікі ў АДКБ.
13 чэрвеня стала вядома, што Арменія адклікала свайго амбасадара з Менску для кансультацыяў, Беларусь на гэта адклікала свайго амбасадара. Прэс-сакратар МЗС Беларусі Анатоль Глаз заявіў, што беларускі бок увогуле не разумее, у чым прэтэнзіі да афіцыйнага Менску, і ўсклаў адказнасць за пагаршэнне двухбаковых стасункаў на кіраўніцтва Арменіі. «Паважаем армянскі народ і шчыра жадаем яму кіраўнікоў, якія будуць сапраўды думаць аб будучыні краіны і дабрабыце людзей», – рэзюмаваў спікер МЗС Беларусі.
Глеб Нержын belsat.eu
