Для рэгістрацыі кандыдатаў у прэзідэнты ініцыятыўным групам трэба сабраць не менш як 100 тысяч подпісаў.
Падпісвацца ў падтрыманне прэтэндэнтаў на пасаду прэзідэнта маюць права асобы, што валодаюць выбарчым правам, – грамадзяне Рэспублікі Беларусь, якім споўнілася 18 гадоў. Пры гэтым адзін чалавек можа падпісацца за некалькіх патэнцыяльных кандыдатаў.
Звесткі пра выбарнікаў уносяцца ў падпісныя лісты рукапісным спосабам – яны могуць запаўняцца як самімі выбарнікамі, так і членамі ініцыятыўных груп, якія збіраюць подпісы. Але выбарнік павінен уласнаручна распісацца і ўказаць у падпісным лісце дату подпісу.
Праводзіць збор подпісаў дазволена з 8.00 да 22.00.
Магчымасць выставіць пікет
[vc_single_image image=”1″ img_size=”large”]
Збор подпісаў можа праводзіцца ў форме пікетавання. Атрымліваць дазвол на арганізацыю пікета не патрабуецца, калі ён праводзіцца ў месцах, дазволеных мясцовымі ўладамі. Спіс месцаў, забароненых для збору подпісаў у форме пікетавання, вызначаны мясцовымі ўладамі.
У Менску, у параўнанні з прэзідэнцкімі выбарамі 2010 года, пералік забароненых месцаў дапоўніўся аб’ектамі чыгуначнага і паветранага транспарту, падземнымі пешаходнымі пераходамі, Прывакзальнай плошчай, а таксама плошчай Якуба Коласа і плошчай Дзяржаўнага сцяга.
Акрамя таго, перадвыбарныя пікеты нельга праводзіць на аб’ектах метрапалітэна, на тэрыторыі цэнтральных плошчаў (Кастрычніцкай, Незалежнасці і Перамогі), на адлегласці менш як 200 метраў ад будынкаў Адміністрацыі прэзідэнта, Нацыянальнага сходу, Савету міністраў, а таксама на адлегласці менш як 50 метраў ад будынкаў органаў дзяржкіравання і мясцовай улады, дыппрадстаўніцтваў і консульскіх устаноў, судоў, органаў пракуратуры і арганізацыяў, якія забяспечваюць абараназдольнасць і бяспеку дзяржавы.
За каго будуць збіраць подпісы?
[vc_single_image image=”3″ img_size=”large”]
Прайшлі рэгістрацыю ў ЦВК і збіраць подпісы будуць восем ініцыятыўных групаў:
Аляксандра Лукашэнкі – дзейнага кіраўнікі дзяржавы;
Сяргея Калякіна – старшыні Беларускай партыі левых «Справядлівы свет»;
Сяргея Гайдукевіча – старшыні Ліберальна-дэмакратычнай партыі;
Таццяны Караткевіч – актывісткі кампаніі «Гавары праўду», прадстаўніка кааліцыі «Народны рэферэндум»;
Анатоля Лябедзькі – старшыні Аб’яднанай грамадзянскай партыі;
Віктара Цярэшчанкі – эканаміста, экс-кандыдата ў прэзідэнты на выбарах 2010 года;
Жанны Раманоўскай – выкладчыка з Брэста, якая часова не працуе;
Мікалая Улаховіча – старшыні Беларускай патрыятычнай партыі, вярхоўнага атамана РГА «Беларускае казацтва».
Самая шматлікая ініцыятыўная група – у Аляксандра Лукашэнкі (10,5 тыс. чалавек). Затым ідуць групы Сяргея Гайдукевіча (2,5 тыс. чалавек), Таццяны Караткевіч (больш за 1,9 тыс.), Сяргея Калякіна і Мікалая Улаховіча (прыкладна 1,5 тыс. у кожнай групе), Анатоля Лябедзькі і Віктара Цярэшчанкі (прыкладна тысяча чалавек). У ініцыятыўнай групе Жанны Раманоўскай, пра якую амаль нічога невядома, – 109 чалавек.
Збор подпісаў за вылучэнне кандыдатаў у прэзідэнты працягнецца па 21 жніўня ўключна.
Пятыя выбары прэзідэнта Рэспублікі Беларусь прызначаны на 11 кастрычніка.
МЛ, паводле БелаПАН
