Раварысту, які збіў бітай мінака, вынеслі прысуд


Фота tut.by

Анатоль Грынкевіч атрымаў 5 гадоў пазбаўлення волі ў калоніі ўзмоцненага рэжыму.

Такі прысуд вынес суд Фрунзенскага раёну 12 верасня. Мужчыну прызналі вінаватым у асабліва злосным хуліганстве. Акрамя гэтага, у Грынкевіча канфіскуюць ровар і ён павінен будзе выплаціць пацярпеламу 10 тысяч рублёў за маральную шкоду.

На мінулым тыдні пракурор запрасіла для яго 7 гадоў калоніі ўзмоцненага рэжыму, а збіты 17-гадовы фатограф Васіль Дземідовіч – 50 тысяч рублёў (каля 25 тысяч долараў) маральнай кампенсацыі.

Анатоль Грынкевіч прызнаў сваю віну, папрасіў прабачэння ў хлопца і звярнуўся да суда з просьбай «не пазбаўляць яго дзіцяці бацькі, а жонку – мужа».

Прысуд не набыў законную моц і можа быць абскарджаны на працягу 10 дзён.

19 чэрвеня Анатоль Грынкевіч на роварнай сцежцы на вуліцы Прытыцкага ў Менску ўдарыў бітай па галаве няпоўнагадовага хлопца і з’ехаў з месца здарэння. Пазней у судзе ён патлумачыў, што спяшаўся дамоў, каб цяжарнай жонцы, якой стала блага.

ДР belsat.eu паводле tut.by

Глядзі таксама
Каментары