Найміты з ПВК Вагнэра атрымалі адпачынкі і масава вяртаюцца з Беларусі дадому ў Расею. Многія кідаюцца ў запой яшчэ на вакзалах. Пра гэта паведамляе выданне «Можем объяснить» са спасылкай на чаты наймітавых сваякоў.
26 ліпеня стала вядома, што вагнэраўцы масава вяртаюцца дадому ў Расею з Беларусі, бо атрымалі адпачынкі. Пра гэта пішуць у чатах іхныя родзічы. Пры гэтым паведамляецца, што астатнія жывуць у выдатных умовах у лагеры пад Асіповічамі.
Паводле выдання «Можем объяснить», з пачатку тыдня сваякі вагнэраўцаў актыўна абмяркоўваюць у чатах набыццё білетаў з Беларусі ў Расею і дэталі вяртання «адпускнікоў». Некаторыя найміты моцна запілі яшчэ ў дарозе дадому і на радзіму вяртацца не спяшаюцца. «Пʼяныя на вакзале. Не каб дамоў. Іх чакаюць, а яны квасяць на сваё задавальненне», – піша адна з удзельніц чату. Гэткіх паведамленняў шмат: «Мой удома, хаця і выпіў. А тыя яшчэ даехаць не паспелі, затое на рагах ужо»; «Мой тэлефануе, кажа – аднаго ўжо на хуткай павезлі, кепска стала».
Каардынатары чатаў для сваякоў паведамляюць, што на адпачынак распушчаная кожная другая брыгада ПВК. У лагеры пад Асіповічамі застаюцца толькі самыя вопытныя, хто будзе заняты вайсковым рыхтаваннем на беларускіх палігонах і накіруецца ў Сірыю і Афрыку.
Сваякі наймітаў абмяркоўваюць, што астатніх у Беларусі трымаюць у выдатных умовах, кормяць смачна і некалькі разоў у дзень. «Яны тушаніны зʼелі больш, чым за ўсё жыццё», – пішуць у чатах. Паведамляецца таксама, што на адрозненне ад базы ў расейскім Молькіне, у беларускі лагер да наймітаў могуць прыязджаць іхныя жонкі. Таксама ў чатах распаўсюджваюць папярэджанні пра небяспеку інтымных кантактаў з прадавачкамі лагернай крамы, якія быццам бы ўсе «жонкі мясцовых КДБэшнікаў».
Выданне таксама паведамляе, што вагнэраўцы, якія даехалі да дому, часта ўступаюць у канфлікт з законам, «звесткі пра іхныя злачынствы паступаюць адусюль». У Кіраўскай вобласці былы найміт ПВК Вагнэра Іван Расамахін вярнуўся з вайны і, паводле версіі следства, забіў 85-гадовую жанчыну. У ПВК ён трапіў з калоніі, дзе адбываў тэрмін за крымінал. На Кубані, паводле звестак паліцыі, былы вагнэравец Дзямʼян Кеваркян забіў дваіх. У Новасібірскай вобласці былы баец ПВК Вагнэра затрыманы за згвалтаванне дзвюх непаўналетніх дзяўчынак.
Антон Тачняк belsat.eu