Міністэрства ўнутраных справаў Літвы спыняе двухбаковае пагадненне аб супрацы з МУС Беларусі. Зрэшты, супраца не вядзецца ажно з 2020 года, пасля фальсіфікацыяў выбараў у Беларусі, паведамляе прэсавая служба літоўскага ведамства.
Пагадненне аб двухбаковай супрацы паміж міністэрствамі ўнутраных справаў Літвы і Беларусі падпісалі ў 1993 годзе. Але, паводле кіраўніцы МУС Літвы Агне Білатайце, рэалізацыя пагаднення спынілася пасля сфальшаваных вынікаў прэзідэнцкіх выбараў у Беларусі ў 2020 годзе.
«Літва не бачыць магчымасці супрацоўнічаць з варожымі рэжымамі. Беларусь, будучы блізкім саюзнікам крамлёўскага рэжыму, працягваючы гібрыдную атаку на Літву і штурхаючы ў нашую краіну нелегальных мігрантаў рукамі сваіх чыноўнікаў, не можа і не будзе партнёрам Літвы ні ва ўнутраных справах, ні ў іншых сферах», – заявіла кіраўніца ведамства.
Акрамя гэтага, Літва прыпыніла рэалізацыю праграмаў трансгранічнай супрацы з Беларуссю і Расеяй, якія фінансуюцца Еўракамісіяй.
Алена Аляксандрава belsat.eu
