У выніку здарэння стала вядома, што прылада фіксацыі хуткасці каштуе Br 24 000.
12 кастрычніка 27-гадовы кіроўца двойчы за дзень патрапіў у аб’ектыў фотарадару пад Воршай. Спачатку ён перавысіў хуткасць раніцай, калі адвозіў знаёмых дзяўчат у Віцебск. Пазней парушыў хуткасны рэжым увечары – зноўку на тым жа месцы.
Прэсавая служба УУС Віцебскага аблвыканкаму падае, што аршанец вырашыў знішчыць прыбор, бо, маўляў, два штрафы – гэта зашмат.
Мужчына накінуў на стацыянарную камеру пятлю і з дапамогай аўтамабіля вырваў яе. Пасля ён адправіўся дахаты, дзе паспрабаваў ускрыць прыбор, каб знайсці месца, дзе захоўваюцца здымкі
Раніцай наступнага дня да яго прыйшлі міліцыянты і патлумачылі, што кадры адразу перадаюцца ў цэнтр фіксацыі правапарушэнняў у Менску.
Паводле міліцыі, сваймі дзеяннямі мужчына прычыніў дзяржаве шкоду ў памеры больш за Br 24000.
Супраць яго завялі крымінальную справу.
ДД; фота анонсу – pdd.by