Адпаведнае рашэнне Майкл Флін прыняў позна ўвечары 13 лютага. Адстаўцы папярэднічала крытыка ў адрас Фліна за абмеркаванне праблемы санкцый з расейскім амбасадарам у Вашынгтоне Сяргеем Кісляком напрыканцы снежня.
Раней тэлеканал Fox News паведаміў, што Флін папрасіў прабачэння ў віцэ-прэзідэнта Майка Пенса за тое, што няправільна праінфармаваў адміністрацыю пра свае кантакты з Кісляком.
У сваёй заяве аб адстаўцы Флін прызнаў, што ў перыяд напапярэдні інаўгурацыі Трампа, ён «па неасцярожнасці падаў віцэ-прэзідэнту і іншым няпоўную інфармацыю адносна тэлефонных размоваў з паслом Расеі».
Пры гэтым саветнік прэзідэнта ЗША Келіан Конуэй заявіла ў інтэрвʼю тэлеканалу MSNBC, што Трамп давярае Фліну.
Раней амерыканскія СМІ паведамілі, што мінюст папярэдзіў Белы Дом пра кантакты Фліна з Кісляком. На думку Мінюста, Флін мог стаць мішэнню для шантажу з боку Расеі.
Новым дарадцам па нацыянальнай бяспецы стане Джозэф Кіт Келаг. Раней ён займаў пасаду кіраўніка апарата Савету па нацыянальнай бяспецы.
Фармальна ў ходзе кантактаў з Кісляком Флін быў яшчэ прыватнай асобай, і яго дзеянні можна трактаваць як парушэнне Акту Логана, які забараняе грамадзянам без адпаведных паўнамоцтваў у весці перамовы з афіцыйнымі прадстаўнікамі іншых дзяржаваў, якія маюць рознагалоссі са Злучанымі Штатамі.
ДР belsat.eu паводле bbc.co.uk
