Аляксандр Лукашэнка павіншаваў беларусаў з Новым Годам. Што ён сказаў у віншаванні і што паабяцаў беларускаму народу ў 2018-м?
«У адыходзячым годзе намі прыняты рашучыя меры па ўдасканаленні эканомікі, што дакладна прывядзе да змены нашага грамадства. Мы рызыкнулі зазірнуць за гарызонт, паставілі перад краінай мэты заўтрашняга дня. Дасягнуць іх – справа многіх гадоў!
У гэтай сувязі мой зварот да моладзі: адважвайцеся, рабіце! Для вас адчыненыя ўсе дзверы! Вы абавязаныя ўзяць гэтую неймаверна цяжкую вышыню. За вамі будучыня краіны! А вам, старэйшаму пакаленню, думаць пра спакой не атрымаецца. Вы нам патрэбныя асабліва цяпер. Патрэбны ваш вопыт, веды, мудрасць.
Менавіта вы павінныя дапамагчы маладым у працэсе складанага руху наперад, зберагчы іх ад неабгрунтаванага імкнення зрабіць усё за імгненне, небяспекі адарвацца ад рэальнага жыцця і выдаткаваць час на бескарыснае»
«Будучы год – напярэдадні вялікіх спартыўных падзей міжнароднага маштабу.
Да нас прыедуць тысячы гасцей. І як сапраўдныя гаспадары беларускай зямлі мы абʼяднаемся і прывядзем наш агульны дом у належны парадак.
Бо Беларусь заўсёды славілася чысцінёю, добраўпарадкаванасцю гарадоў і вёсак, гасціннасцю людзей. Але цяпер нам трэба перасягнуць саміх сябе. Трэба зрабіць краіну ўзорнай. Каб кожны госць надоўга захаваў у душы цёплыя ўспаміны пра яе. Каб мы маглі яшчэ больш ганарыцца сваёй Радзімай – дагледжанай, утульнай для жыцця, прыязнай і паважанай у свеце.
Менавіта за такую краіну – свабодную, незалежную – нашыя продкі змагаліся, каб мы, тыя, што жывуць на гэтай зямлі, былі тут сапраўднымі гаспадарамі. Пераемнасць, павага да заслуг кожнага чалавека, роўнасць і справядлівасць – асноўныя прынцыпы нашай дзяржавы. Беларусь – краіна, накіраваная ў будучыню! Аснова нашага развіцця – высокія тэхналогіі, навука. Гэта так! Але заўсёды будзе запатрабаваная праца рабочага і селяніна. Дзякуючы іх намаганням мы сёння за багатым святочным сталом»
«Галоўным здабыткам беларускай зямлі былі і застаюцца людзі. За ўсімі дасягненнямі стаіце менавіта вы – разумныя, таленавітыя, мэтанакіраваныя. Тыя, хто штодня змагаецца за жыццё і здароўе кожнага свайго пацыента. Хто стаіць на варце закона і парадку, ахоўвае межы, забяспечвае абарону і бяспеку нашай краіны, займае дзяржаўныя пасады. Хто працуе ў шахтах і завадскіх цэхах, на будаўнічых пляцоўках і ў сельскай гаспадарцы. Хто гадуе і выхоўвае дзяцей, паспяхова перадае веды школьнікам і студэнтам, прасоўвае навуку».
НМ/КА, belsat.eu, фотаздымак з сайту кіраўніка Беларусі