Візавы цэнтр «VFS Global» паведаміў пра змены ў правілах падачы дакументаў. Звярнуцца па візу ў любым горадзе Беларусі больш не атрымаецца.
Новае правіла пачне дзеяць 2 кастрычніка. З таго дня выбар візавага цэнтру будзе залежаць ад месца жыхарства, пазначанага ў пашпарце.
Падаць дакументы ў Менску, Магілёве і Гомлі змогуць тыя, хто зарэгістраваны ў сталічным рэгіёне, Магілёўскай і Гомельскай вобласцях адпаведна.
Зарэгістраваным у Берасцейскай вобласці трэба звяртацца ў візавыя цэнтры ў Берасці, Баранавічах або Пінску.
Праўда, выключэнне зрабілі для Горадні і Ліды – там, як і раней, можна будзе падаць дакументы, не зважаючы на месца прапіскі.
У «VFS Global» таксама паведамілі, што ўладальнікі біяметрычных пашпартоў пры звароце ў цэнтры ў Менскай і Берасцейскай вобласцях мусяць дадаткова прынесці дакумент, што пацвярджае рэгістрацыю паводле месца жыхарства.
Раней такі тэрытарыяльны падзел датычыў толькі замежных грамадзянаў, а беларусы маглі падаваць дакументы на візу ў любым цэнтры.
15 верасня Міністэрства замежных справаў Польшчы абвесціла, што будуць скасаваныя кантракты з усімі кампаніямі-пасярэднікамі, якія прымаюць дакументы на візы. У каментары «Белсату» ведамства пры гэтым падкрэсліла: выкананне гэтага рашэння вымагае часу. У міністэрстве таксама запэўнілі, што без візаў беларусы не застануцца.
Крыніцы выдання «RMF FM» кажуць, што Польшча наогул не будзе скасоўваць дамоваў з візавымі цэнтрамі ў Беларусі, Турэччыне і Украіне, каб не ствараць перашкодаў беларусам, украінцам і турэцкім студэнтам.
Сяргей Крот belsat.eu