У Беларусі забаранілі прадукцыю Арарацкага каньячнага заводу. Але не каньяк «Арарат»
Пастанова галоўнага санітарнага лекара Беларусі ад 19 сакавіка забараняе ўвозіць, прадаваць і захоўваць прадукцыю армянскага ТАА «Арарацкі каньячны завод». Але ў забароне вінаваты не каньяк, а папулярны «Арарат» вырабляе іншы завод.
Забарону ўвялі праз тое, што ў складзе гранатавага віна «Айрум» знайшлі звесткі, якія не адпавядалі фактычнаму складу. У віне аналіз выявіў фарбавальнік азарубін (Е122), якога на этыкетцы не было. Праз гэта забаранілі ўвозіць усю прадукцыю Арарацкага каньячнага заводу, а імпарцёру загадалі вярнуць ці ўтылізаваць прадукцыю заводу.
Гэты завод вырабляе розныя віды моцных алкагольных напояў, якія традыцыйна называюць каньякамі, але вядомы каньяк «Арарат» робіцца не Арарацкім каньячным заводам, а іншым прадпрыемствам, Ерэванскім каньячным заводам. Яго прадукцыі не забаранялі.
Каньяк – асаблівы від брэндзі з аднайменнай камуны ў Францыі. У Савецкім Саюзе словам «каньяк» называлі любы брэндзі, блізкі паводле тэхналогіі да французскага каньяку. «Арарат» насамрэч фармальна не каньяк, а арбун (Արբուն), хоць яго з 1997 года выраблялі паводле тэхналогіі, блізкай да класічнай французскай.
У Беларусі забараняюць імпарт ці экспарт тавараў не толькі з санітарных прычынаў. Гэтак, пастанова Савету Міністраў ад 22 сакавіка, апублікаваная 26 сакавіка, працягнула яшчэ на паўгода забарону на вываз з Беларусі або за межы Еўразійскага эканамічнага саюзу больш як 250 відаў тавараў.
З Беларусі нельга без адпаведнага сертыфікату аб паходжанні або ліцэнзіі вывозіць шматлікія віды медычных, прамысловых і побытавых тавараў, ад пральных машынаў да ядравых рэактараў, ад адходаў стальной вытворчасці да смартфонаў, ад ровараў да трактароў, ад чыгуначных вагонаў да цэпелінаў.
У Еўразвязе тым часам заклікаюць забараніць імпарт беларускага і расейскага збожжа, але пакуль не могуць ухваліць нават мыта на аграрную прадукцыю з Беларусі і Расеі.
Алесь Наваборскі belsat.eu
