«Белгідрамет» абвесціў штармавое папярэджанне з увагі на слізкія дарогі. Узровень небяспекі – памаранчавы. ДАІ перайшла на ўзмоцнены рэжым працы і заклікала да «стрыманага стылю кіравання».
Паводле МУС, за содні ў ДТЗ загінулі 3 чалавекі, 17 пацярпелі.
У пятніцу ў Гарадоцкім раёне на Віцебшчыне ў аварыю трапіў турыстычны аўтобус Віцебск – Пецярбург. У салоне былі 26 асобаў, у тым ліку два кіроўцы. Шасцёра пасажыраў і адзін кіроўца пацярпелі, іх даставілі ў шпіталь у Віцебску, паведамілі ў МНС. Паводле папярэдніх звестак, аўтобус сутыкнуўся з цяжкавіком, што стаяў на абочыне.
Сёння ў Беларусі абвесцілі штармавое папярэджанне – трэці дзень запар: 23 лістапада – праз моцны снег і вецер, 24-га – з увагі на моцны вецер, а сёння – праз галалёдзіцу.
ДАІ перайшла на ўзмоцнены рэжым працы, заклікала кіроўцаў прытрымлівацца «стрыманага стылю кіравання», пазбягаць рэзкіх манеўраў і быць асабліва пільнымі каля пешаходных пераходаў.
Сцяпан Кубік belsat.eu