Праз электронны аўкцыён «БелЮрЗабеспячэнне» паўторна выставілі на продаж нерухомасць былога прэтэндэнта на прэзідэнцтва Валерыя Цапкалы. Увагу на гэта звярнула «Zerkalo».
Гаворка пра трохпакаёвую кватэру агульнаю плошчаю 103,7 квадратнага метра з машына-месцам у доме № 5 на вуліцы Чарнышэўскага ў Менску. У кватэры зарэгістраваны адзін чалавек. Яе прадаюць з убудаванымі шафамі, кандыцыянерам, кухонным гарнітурам, выцяжкай, варачнай панэллю.
Пры гэтым адзначаныя наступныя абцяжаранні: арышт следчых органаў, забарона рэгістрацыйных дзеянняў рэгістравальнага органу, судовага выканаўцы.
Пачатковую цану маёмасці знізілі больш чым на 71 000 рублёў – да 286 753,76 рубля. Аўкцыён прызначылі на 9 красавіка.
У лютым 2024 года нерухомасць ужо спрабавалі прадаць. Аўкцыён не адбыўся праз адсутнасць удзельнікаў. Стартавая цана за трохпакаёўку была 358 442,2 рубля. Звычайна кватэры падобнай плошчы і на прыблізна такой адлегласці ад цэнтру Менску прадаюцца за 500–700 тыс. рублёў, а такую цану за квадратны метр можна сустрэць у адзінкавых абвестках, і тыя кватэры прадаюцца без машына-месца.
Вераніка Цапкала папярэдзіла будучых пакупнікоў жытла, што сям’я «абавязкова вернецца дадому і запатрабуе аплаты арэндных плацяжоў за ўвесь перыяд карыстання маёмасцю».
Якуб Хруст belsat.eu
