Уладальнік рэстаранаў хуткага харчавання «Вкусно – и точка», якія адкрыліся ў Расеі пасля сыходу «McDonald’s», падаў заяўку на рэгістрацыю брэнда ў Беларусі, паведамляе Sputnik.
Аднак пакуль расейская кампанія вырашыла зарэгістраваць у краіне не асноўны гандлёвы знак, а «Доставка – и точка».
Нагадаем, 11 лістапада мінулага года стала вядома, што «McDonald’s» прыняў рашэнне сысці з беларускага рынку. Рэстараны «McDonald’s» у Беларусі закрыліся 21 лістапада, а з 22 лістапада у гэтых жа будынках павінен быў пачаць працаваць расейскі брэнд «Вкусно – и точка». Аднак Аляксандр Лукашэнка заявіў, што іх месца павінны заняць беларускія прадпрыемствы і вытворцы. Тады 28 лістапада рэстараны адкрыліся без шыльдаў «McDonald’s» або «Вкусно – и точка», а пад назвай юрыдычнай асобы «КСБ Віктары Рэстараны».
«McDonaldʼs» прыпыніў працу ў Расеі 14 сакавіка 2022 года з прычыны вайны ва Украіне. У чэрвені ў Расеі былыя «МакДональдсы» адкрыліся пад брэндам «Вкусно – и точка» – бізнес прадалі прадпрымальніку Аляксандру Говару. Рэстараны пад новым брэндам спрабавалі паўтарыць меню «McDonaldʼs», але дагэтуль не прапанавалі добрага аналагу некаторым стравам.
Алена Рувіна belsat.eu
