Дзяржаўны выбаркам Польшчы абнародаваў вынікі галасавання польскіх грамадзянаў за мяжою. У Беларусі кіроўную партыю «Закон і справядлівасць» выбралі 36,36 %, і гэта самы вялікі паказнік сярод усіх замежных участкаў.
У Беларусі палякі галасавалі ў амбасадзе ў Менску. Сапраўднымі прызнаныя 88 бюлетэняў.
Кіроўная партыя «Закон і справядлівасць» набрала 36,36 %, Грамадзянская кааліцыя – 30,68 %, правацэнтрысцкая кааліцыя «Трэцяя дарога – 11,36 %, ультраправая «Канфедэрацыя» – 10,23 %, «Новыя левыя» – 9,09 %.
Акрамя Беларусі, партыя «Закон і справядлівасць» атрымала больш за ўсё галасоў у Косаве (34,21 %), у Малдове (28,74 %), Босніі і Герцагавіне (23,74 %) і Літве (21,11 %).
Апазіцыйная Грамадзянская кааліцыя аказалася найпапулярнейшай у Люксембургу (53,28 %), на Кіпры (53,01 %), у Іспаніі (51,43 %), Турцыі (51 %) і Сербіі (50,27 %).
Як паведамляў раней «Белсат», кіроўная партыя «Закон і справядлівасць» хаця і атрымала на выбарах бальшыню галасоў, страціла бальшыню ў польскім парламенце. Калі апазіцыя (Грамадзянская кааліцыя, «Трэцяя дарога» і «Новыя левыя») дамовіцца паміж сабою, яна зможа стварыць кааліцыю і сфармаваць урад.
Сяргей Крот belsat.eu