Колькасць загінулых у выніку залеваў, якія абрынуліся на Паўднёвую Карэю, дасягнула 35 асобаў. Пра гэта паведамляе Yonhap.
Целы дзевяці асобаў дасталі з тунэлю ў горадзе Чхонг-Джу, дзе былі затопленыя 14 аўтамабіляў і аўтобус пасля таго, як дажджы разбурылі дамбу на найбліжэйшай рацэ. Лічба ахвяраў у тунэлі неканчатковая.
Паўднёвакарэйскае Міністэрства ўнутраных справаў і бяспекі паведаміла, што станам на 11:00 (05:00 паводле Менску) па ўсёй краіне зніклі без вестак 10 чалавек, бо моцныя залевы выклікалі апоўзні і паводкі. Загады аб эвакуацыі ахопліваюць 7866 чалавек.
Звесткі ведамства не ўключаюць тых, хто заставаўся ў затопленым тунэлі, бо не зразумела, колькі людзей апынуліся ў пастцы пад вадой.
Прэзідэнт Юн Сок Ёль заявіў, што некаторыя рэгіёны не прынялі прэвентыўных захадаў супраць экстрэмальнага надвор’я.
Метэаралагічнае ўпраўленне Карэі заявіла, што да 18 ліпеня ў цэнтральнай і паўднёвай частках краіны можа выпасці яшчэ да 300 міліметраў дажджу.
Карэйская чыгуначная карпарацыя спыніла ўсе павольныя цягнікі і некаторыя звышхуткасныя пасажырскія экспрэсы, асцерагаючыся апоўзняў, абвалаў і затаплення каляінаў.
Якуб Хруст belsat.eu
