Акцыя памяці мастака Алеся Пушкіна і новая хваля пратэстаў у Ізраілі. Здымкі тыдня

Прэзідэнта Украіны Уладзіміра Зяленскага вітаюць прэзідэнт Літвы Гітанас Наўседа, прэм’ер-міністр Вялікай Брытаніі Рышы Сунак, прэзідэнт ЗША Джо Байдэн, прэмʼер-міністарка Італіі Джорджа Мэлёні, генеральны сакратар NATO Енс Стольтэнбэрг і намеснік генеральнага сакратара NATO Мірча Джоанэ па прыбыцці на пасяджэнне падчас саміту NATO ў Вільні, Літва.

Наведнікі традыцыйнага фестывалю «Сан-Фэрмін» уцякаюць ад быка падчас гонак з быкамі ў Памплёне, Іспанія.

Людзі назіраюць за вывяржэннем вулкану на паўвостраве Рэйк’янэс недалёка ад Рэйкʼявіку, Ісландыя.

Ізраільская паліцыя затрымлівае дэманстрантку на акцыі пратэсту супраць планаў прэм’ер-міністра Бэньяміна Нэтаньягу рэфармаваць сістэму правасуддзя. Масавыя дэманстрацыі адбыліся пасля таго, як парламенцкая кааліцыя прэмʼер-міністра першапачаткова ўхваліла законапраект, які дазволіць абмежаваць права Вярхоўнага Суда адмяняць рашэнні ўраду, міністраў і чыноўнікаў. Тэль-Авіў, Ізраіль.

Украінская жаўнерка заплятае дзяўчынцы валасы перад палявымі выпрабаваннямі ўзораў жаночай вайсковай формы ініцыятывы «Arm Women Now», ухваленай Міністэрствам абароны Украіны. Палігон пад Кіевам, Украіна.

Беларусы Вільні выйшлі на стыхійную акцыю ў памяць палітзняволенага мастака Алеся Пушкіна, які памёр у рэанімацыі 11 ліпеня праз нясвоечасовае наданне медычнай дапамогі. Мастаку было 57 гадоў, з якіх два апошнія ён заставаўся за кратамі. Такія ж акцыі адбыліся ў шматлікіх гарадах і краінах, дзе жывуць беларусы. Вільня, Літва.

Аліна абдымае свайго мужа Андрэя ў шпіталі ў Кіеве. Андрэй – афіцэр-выведнік 47-й брыгады ЗСУ, які падчас выканання баявога задання трапіў пад абстрэл. У выніку выбуху снараду ён страціў абедзве рукі, вочы і часткова слых. Аліна дапамагае мужу паесці, сустракае фізіятэрапеўта, а пасля працэдуры – проста кладзецца побач. Кіеў, Украіна.

Мужчына пераносіць сабаку ў больш бяспечнае месца падчас паводкі ў Нью-Дэлі. Рака Ямуна выйшла з берагоў з прычыны мусонных дажджоў, якія абрынуліся на поўнач Індыі. Не менш за 100 чалавек загінулі па ўсёй краіне.

Людзі падымаюць вялікі балгарскі сцяг падчас падрыхтоўкі да ўрачыстага адкрыцця флагштока вышынёй 111 метраў ля гораду Смолян. Паводле арганізатараў, флагшток будзе самы высокі ў Еўрапейскім Звязе. Смолян, Балгарыя.

Пешаходы ў Токіа праходзяць праз вадзяныя туманы, якія ствараюць для гараджанаў падчас спякоты. Паводле Японскага метэаралагічнага агенцтва, у сталіцы была зафіксаваная тэмпература звыш 39 °C. Токіа, Японія. Фото: Naoki Nishimura / AFLO / East News