Лельчыцкая газета «Светлае жыццё» паведаміла, што ў раёне ўведзены рэжым «контртэрарыстычнай аперацыі». У райвыканкаме карэспандэнту «Белсату» як прыватнай асобе ўдакладнілі, што гэта вучэнні.
«У нас ідуць вучэнні, аніякім чынам гэта на грамадзянах не адбіваецца. Проста вучэнні, службы спраўджваюць свае сістэмы апавяшчэння, таму, каб народ не пужаўся, што сірэны гудуць, запусцілі ў сацсеткі, каб людзі ведалі. Усё ў парадку, не хвалюйцеся», – сказалі ў Лельчыцкім раённым выканкаме.
Выданне «Светлае жыццё» раней апублікавала інфармацыю Гомельскага абласнога кіравання КДБ пра тое, што ў раёне, які мяжуе з Украінаю, уведзены рэжым «контртэрарыстычнай аперацыі»:
«Насельніцтва раёну просім захоўваць спакой і падпарадкоўвацца патрабаванням супрацоўнікаў сілавых структураў».
Тым часам у Дзяржаўнай памежнай службе Украіны паведамілі выданню «Зеркало», што «значнай актыўнасці» у Лельчыцкім раёне Беларусі не заўважылі.
«Інфармацыя пра ўвядзенне ў адным з раёнаў Гомельскай вобласці, што мяжуе з Украінаю, рэжыму «контртэрарыстычнай аперацыі» больш падобна на прыцягненне ўвагі. Паводле інфармацыі, што маецца, у гэтым раёне на тэрыторыі Беларусі планаваліся нейкія чарговыя бясконцыя вучэнні, якія ладзяцца там стала. Не выключана, што гэтыя вучэнні яны пастанавілі назваць «контртэрарыстычнай аперацыяй»», – сказаў спікер ведамства Андрэй Дэмчанка.
Паводле заканадаўства, у зоне, дзе ладзяць контртэрарыстычную аперацыю, сілавікі маюць права, напрыклад, абмяжоўваць або забараняць рух транспарту і людзей, «бесперашкодна ўваходзіць» у кватэры і арганізацыі, выкарыстоўваць аўтамабілі грамадзянаў «у неадкладных выпадках».
Сцяпан Кубік belsat.eu