Савет міністраў распарадзіўся пагасіць з рэспубліканскага бюджэту частку крэдытаў сямі беларускіх прадпрыемстваў. На гэты раз субсідыі вырашылі вылучыць прадпрыемствам мяса-малочнай галіны.
Згодна з урадавай пастановай №161 ад 7 сакавіка, апублікаванай 13 сакавіка на Нацыянальным прававым інтэрнэт-партале, мэтавыя субсідыі пойдуць на выплату часткі працэнтаў за карыстанне банкаўскімі крэдытамі:
- па крэдытах у беларускіх рублях памер субсідыі – 30% стаўкі рэфінансавання,
- па крэдытах у замежнай валюце – 30% стаўкі па крэдыце па пазыках, але не больш за 2,5% (выплачвацца будзе ў рублёвым эквіваленце па афіцыйным курсе Нацбанку на дзень пералічэння субсідыі).
Фінансавую дапамогу ў пагашэнні крэдытаў атрымаюць наступныя прадпрыемствы:
- Верхнядзвінскі масласырзавод,
- Віцебскі мясакамбінат,
- Глыбоцкі малочнакансервавы камбінат,
- Аршанскі мясакансервавы камбінат,
- Полацкі малочны камбінат,
- Пастаўскі малочны завод,
- Глыбоцкі мясакамбінат.
Раней аналагічным чынам урад распарадзіўся закрыць частку крэдытаў пяці дрэваапрацоўчых прадпрыемстваў, трох прадпрыемстваў лёгкай прамысловасці і трох цэментных заводаў.
Таксама ўрад Беларусі прадставіў адтэрміноўку выплаты падаткаў тым прадпрыемствам, якія ўвозяць тавары на тэрыторыю ЕАЭС.
Ася Саковіч belsat.eu
