Газета Ушацкага райвыканкаму «Патрыёт» паведамляе, што быў адкрыты адмысловы дабрачынны рахунак, куды можна перавесці грошы на аднаўленне помніку архітэктуры XVIII стагоддзя.
У вёсцы Селішча ва Ушацкім раёне бернардыны пабудавалі касцёл Святой Веранікі разам з кляштарам у 1726 годзе. Падчас Другой сусветнай вайны касцёл моцна пацярпеў. Яго не аднаўлялі, і ён працягваў разбурацца. У красавіку 2023 года стала вядома, што абрынулася сцяна бернардынскага кляштару.
Пры гэтым касцёл ды кляштарны корпус бернардынаў у Селішчы з 2007 года прызнаны гістарычна-культурнай каштоўнасцю. Паводле Кодэксу аб культуры, уласнікі такіх будынкаў мусяць забяспечваць іх захаванасць.
Імаверна, дзяржава адмовілася выдаткоўваць грошы на захаванне гістарычна-культурнай каштоўнасці, таму газета Ушацкага райвыканкаму была вымушаная абвесціць дабрачынны збор сродкаў.
«Думаецца, што шмат каму хацелася б захаваць гэтую гістарычна-культурную каштоўнасць. Касцёлу цяпер тэрмінова патрэбныя кансервацыйныя і аднаўленчыя працы (стварэнне часовага даху, сховішча фрагментаў сцэнаў)», – гаворыцца ў паведамленні мясцовай газеты.
Адзначаецца, што для гэтых мэтаў быў адкрыты адмысловы дабрачынны рахунак, на які можна пералічыць любую суму на захаванне касцёлу: BY39AKBB31320112601822300000, код AKBBBY2X, УНП 300006248.
Глеб Нержын belsat.eu