Telegram-канал «заброшеннаябеларусь» паведаміў пра разбурэнне старажытнага кляштару бернардынаў у вёсцы Селішча ва Ушацкім раёне. Спробы аднавіць гісторыка-культурную каштоўнасць некалі былі, аднак ні да чаго не прывялі.
Бернардыны пабудавалі касцёл святой Веранікі разам з кляштарам у 1726 годзе. Падчас Другой сусветнай касцёл моцна пацярпеў. Яго не аднаўлялі, і ён працягваў разбурацца.
Telegram-канал «заброшеннаябеларусь» піша, што аднавіць будынак нібыта спрабавалі: «Нават прыязджаў хтосьці з каталіцкай дыяцэзіі развязваць праблему. Аднак праз адсутнасць даху ад ідэі адмовіліся: занадта дорага».
Сцяна бернардынскага кляштару абрынулася каля двух тыдняў таму.
«І калі касцёл выглядае разбураным, то ад жылога корпусу кляштару бернардынаў засталося і за тое менш. Літаральна два тыдні таму там абрынуліся рэшткі сценаў», – паведамляюць аўтары.
Тутэйшыя апавядаюць, што часта ў касцёл прыязджае мужчына, які расстаўляе ўнутры знічкі і абразы. Таксама заязджае моладзь і адпачывае ў намётах.
Гэты касцёл ды кляштарны корпус бернардынаў у Селішчы прызналі гісторыка-культурнай каштоўнасцю ў 2007 годзе. Паводле Кодэксу аб культуры, уласнікі такіх будынкаў мусяць забяспечваць іх захаванасць.
Сяргей Крот belsat.eu