Расея плануе выйсці на адміністратыўныя межы Данецкай і Луганскай вобласцяў, цяпер вораг спрабуе ўтрымаць сухапутны калідор і замацавацца ў межах Херсону, паведамляе УНІАН.
Расейская Федэрацыя амаль завершыла падрыхтоўку да наступальнай аперацыі на ўсходзе Украіны і можа распачаць актыўныя баявыя дзеянні ў бліжэйшы час, зазначыў падчас брыфінгу ва Украінскім медыяцэнтры спікер Міністэрства абароны Украіны Аляксандр Матузянік.
«Паводле нашай інфармацыі, вораг перайшоў да фазы завяршэння аднаўлення сваіх падраздзяленняў і перакідвання іх на тэрыторыі Данецкай і Луганскай вобласцяў. Мы прагназуем, што актыўныя баявыя дзеянні пачнуцца на гэтых тэрыторыях ужо недзе ў бліжэйшы час. Адначасова ўкраінская армія да гэтага гатовая. Мы не можам прагназаваць, калі менавіта гэта адбудзецца. Ёсць паведамленні заходніх крыніц. У той жа час вораг ужо амаль скончыў падрыхтоўку да наступальнай аперацыі», – сказаў Матузянік.
Спікер Мінабароны таксама зазначыў, што з пачатку актыўнай фазы вайны Расеі супраць Украіны, у Данецкай і Луганскай вобласцях штурмавыя дзеянні з боку праціўніка фактычна не спыняліся, а апошнім часам колькасць расейскіх войскаў там значна павялічылася.
Надоечы Аляксей Арастовіч таксама казаў пра два тыдні цяжкіх баёў на Данбасе, што чакаюць Украіну, і якія вызначаць наступную фазу вайны.
Кіраўнік Луганскай вобласці Сяргей Гайдай прагназуе «марыупальскі» сцэнар на Луганшчыне.
Генерал-маёр запасу СБУ Віктар Ягун лічыць, што новая фаза нападу расейцаў можа пачацца ўжо на гэтым тыдні.
ГГ, belsat.eu