Чалавек з сякерай напаў на брыгаду хуткай дапамогі ў Менску. Медыкі ў рэанімацыі
Пра нападзенне на брыгаду хуткай дапамогі чалавека з сякерай паведаміла ініцыятыва «Белыя халаты», пазней інфармацыю пра здарэнне пацвердзілі ў афіцыйным тэлеграм-канале Міністэрства аховы здароўя.
«Брыгада спецыялістаў хуткай дапамогі прыбыла на выклік да пацыента ў Менску, а пацыент напаў на іх з сякерай.
Абодва фельчары шпіталізаваныя ў сталічную лякарню», – паведамляе Мінздароўя.
Паводле афіцыйнай інфармацыі, у медыкаў дыягнаставалі спалучаныя траўмы, стан пацярпелых – «сярэдняй ступені цяжкасці».
«Белыя халаты» паведамлялі пра тое, што пацярпелыя медыкі знаходзяцца ў рэанімацыі.
Як удалося высветліць журналістам «Зеркала», пацыента, які ўчыніў напад на лекараў хуткай дапамогі, трэба было даставіць у РНПЦ псіхічнага здароўя ў Навінках. Пацярпелыя – 42-гадовы Сяргей Савельеў і 30-гадовы Глеб Чарнякоў. Яны фельчары спецбрыгады для перавозкі псіхічна хворых гарадской станцыі хуткай дапамогі.
Пазней бацька хворага пацыента выклікаў яшчэ адну брыгаду, якая прыехала ўжо разам з міліцыяй.
Зміцер Міраш belsat.eu
