Узнагароду «Хрест хоробрих» пасмяротна прызначылі беларускаму добраахвотніку Змітру Гансу Рубашэўскаму, які загінуў, абараняючы Украіну.
Зміцер Рубашэўскі загінуў 12 красавіка 2022 года падчас выканання задання на Луганшчыне. Ён адзначыўся ў шматлікіх баях падчас вайны на ўсходзе Украіны ў 2015-м. Быў тройчы паранены, страціў вока. Яшчэ пры жыцці быў узнагароджаны званнем «Народны Герой Украіны».
На фотаздымку – медаль Змітра трымае ягоная маленькая дачка. Здымак даслаў «Белсату» Аляксей Францкевіч – кіраўнік фонду «Вільна Білорусь».
Вядома як мінімум пра 36 беларускіх добраахвотнікаў, які загінулі з пачатку поўнамаштабнай вайны ва Украіне.
Ва Украіне застаюцца прыкладна 700 добраахвотнікаў з Беларусі, якія ўдзельнічаюць у вайне на баку ЗСУ. Такія лічбы прыводзіць расейскай выданне «Известия» са спасылкай на аналітычную запіску Мінабароны РФ. Выданне заяўляе, што сапраўднасць дакументу пацвердзілі тры крыніцы ў вайсковым ведамстве.
Паводле звестак расейскага Міністэрства абароны, з пачатку вайны ва Украіну прыехалі больш за 12,7 тысячы добраахвотнікаў з 88 дзяржаў. З іх больш за 5,4 тысячы былі забітыя, а 5,3 тысячы вярнуліся назад. Паводле інфармацыі ведамства, цяпер ва Украіне застаюццаа 1940 замежных ваяроў. Нібыта з іх сфармаваныя чатыры пяхотныя батальёны па 300–400 чалавек кожны, а таксама батальёны спецыяльнага прызначэння.
Марыя Міхалевіч belsat.eu