Прапанову ўвесці адміністратыўнае пакаранне беспрацоўных агучыў начальнік УУС Гарадзенскага аблвыканкаму Дзмітрый Разянкоў, піша «Вечерний Гродно».
«Што ў гэтым кепскага – законным шляхам прымусіць людзей працаваць, прыносіць карысць у першую чаргу сабе і сваёй сям’і, а па-другое – грамадству? Каб меліся сродкі да існавання. А не так, як некаторыя цяпер: скраў, выпіў, сеў, скраў, выпіў, сеў. За чатыры гады – пяць судзімасцяў. І такія выпадкі бываюць», – апавёў Дзмітрый Разянкоў на прэс-канферэнцыі 1 лютага.
Органы ўнутраных справаў плануюць унесці прапанову аб адміністратыўным пакаранні за дармаедства ў парламент пасля выбараў дэпутатаў (парламенцкія выбары ў Беларусі пройдуць 25 лютага), а таксама агучыць на Усебеларускім народным сходзе.
Увесці падобны артыкул у Кодэкс аб адміністратыўных парушэннях МУС Беларусі прапаноўваў яшчэ ў 2015 годзе. Тады хацелі штрафаваць поўнагадовых працаздольных грамадзянаў, якія стала жывуць на тэрыторыі Беларусі і цягам 6 месяцаў «ухіляюцца ад аплаты падаткаў, збораў ды іншых плацяжоў». Для «зацятых ухілістаў» прадугледжваўся арышт з прымусовым скіраваннем на працу.
Потым пастанавілі ўвесці «падатак на дармаедства» – паводле Дэкрэту Лукашэнкі № 3, беларусы, якія не працавалі больш за 6 месяцаў, мусілі заплаціць 20 базавых велічыняў. Пасля хвалі пратэстаў у 2017 годзе Дэкрэт адмянілі, людзям, якія сплацілі «падатак», нават вярнулі грошы. Але неўзабаве для дармаедаў увялі аплату камунальных паслуг паводле поўных тарыфаў.
31 студзеня на Нацыянальным прававым інтэрнэт-партале апублікавалі пастанову ўраду, якая ўносіць змены ў пастановы 2018 года наконт парадку аднясення працаздольных грамадзянаў да незанятых у эканоміцы. Новая пастанова пашырыла крытэры для ўнясення ў «базу дармаедаў».
Адміністратыўны артыкул за дармаедства існаваў у Савецкім Саюзе – беспрацоўнага маглі пакараць арыштам на год.
Марыя Міхалевіч belsat.eu
