Суд у сталіцы Судану Хартуме вынес прысуд былому кіраўніку краіны, зрынутаму сёлета ў красавіку. Пра гэта паведамляе «Al-Jazeera».
14 снежня 75-гадовы Умар аль-Башыр быў прызнаны вінаватым у незаконным захоўванні замежнай валюты, атрыманні грошай з-за мяжы і адмыванні незаконных даходаў. Яго асудзілі на два гады турмы.
З прычыны сталага веку былы суданскі дыктатар будзе адбываць пакаранне ў карэкцыйным цэнтры.
Пераварот у Судане адбыўся 11 красавіка, калі ваенны савет узяў на сябе кіраванне краінай, а прэзідэнт Умар аль-Башыр быў узяты пад варту. Новыя ўлады ўвялі ў краіне надзвычайнае становішча тэрмінам на тры месяцы і зачынілі межы.
Аль-Башыр кіраваў Суданам 30 гадоў з моманту перавароту ў 1989 годзе. У 2008 годзе Міжнародны крымінальны суд вынес ордар на яго арышт паводле абвінавачвання ў генацыдзе.
МГ belsat.eu
