ЕЗ чакае ад Беларусі неадкладнага афіцыйнага запрашэння БДІПЧ АБСЕ назіраць за прэзідэнцкімі выбарамі. Пра гэта гаворыцца ў заяве Вярхоўнага прадстаўніка Еўразвязу па замежных справах і палітыцы бяспекі Жузэпа Бурэля, піша TUT.by.
У лісце гаворыцца, што Валерый Цапкала і Віктар Бабарыка набралі больш за 100 тысяч подпісаў, аднак абодвум адмовілі ў рэгістрацыі ў якасці кандыдатаў у прэзідэнты.
«Адсутнасць празрыстасці ў працэсе праверкі подпісаў у падтрымку кандыдатаў у прэзідэнты, як ужо адзначала Бюро па дэмакратычных інстытутах і правах чалавека Арганізацыі па бяспецы і супрацы ў Еўропе ў 2010 і 2015 гадах, падрывае давер да працэсу рэгістрацыі. Больш за тое, прававыя палажэнні аб рэгістрацыі кандыдатаў ствараюць непрапарцыйныя і неабгрунтаваныя бар’еры для кандыдатаў, што супярэчыць абавязкам АБСЕ і іншым міжнародным стандартам», – адзначаецца ў заяве.
Еўразвяз шкадуе аб тым, што рэкамендацыі БДІПЧ АБСЕ, у прыватнасці, аб увядзенні дакладных і разумных крытэрыяў і механізмаў для рэгістрацыі кандыдатаў і праверкі подпісы, не былі рэалізаваныя. ЕЗ чакае ад Беларусі неадкладнага афіцыйнага запрашэння БДІПЧ АБСЕ назіраць за прэзідэнцкімі выбарамі.
У ЕЗ перакананыя, што выключэнне кандыдатаў абмяжоўвае магчымасць беларускага народа выказваць сваю волю, а таксама падрывае агульную дэмакратычнасць выбараў. Еўразвяз таксама чакае ад Менску павагі да правоў беларусаў на свабоду выказвання меркаванняў і мірных сходаў.
«Мы падтрымліваем незалежнасць і суверэнітэт Беларусі, але правы чалавека і дэмакратыя застануцца вызначальнымі для ЕЗ пры фармаванні ягонай палітыкі ў дачыненні да краіны», – гаворыцца ў заяве.
ІІ belsat.eu